Мадриднинг «Реал» клуби дарвозабони Тибо Куртуа жамоа билан ҳамкорликни давом эттиришга яқин турибди.

Таниқли инсайдер Фабрицио Романонинг хабар беришича, «қироллик клуби» раҳбарияти бельгиялик футболчи билан янги шартнома юзасидан музокараларни муваффақиятли якунлаган. Томонлар келишувга эришган бўлиб, янги битим 2028 йилгача амал қилади.

34 ёшли Куртуа 2018 йилнинг август ойидан буён «Реал» шарафини ҳимоя қилиб келмоқда. Унинг амалдаги шартномаси 2027 йилнинг ёзида ўз ниҳоясига етади.

Айни пайтда тажрибали дарвозабоннинг трансфер қиймати 15 миллион еврога баҳоланмоқда.

Жорий мавсумда Куртуа Испания чемпионатида 9 та учрашув ўтказиб, дарвозасидан 9 та гол ўтказиб юборди. Иккита баҳсда эса дарвозаси дахлсизлигини сақлаб қолди.