«Бавария» ярим ҳимоячиси Жамал Мусиала жароҳатидан кейин келаси ҳафта майдонга қайтиши мумкин.
Футболчи сентябрь ойида Германия терма жамоаси ихтиёрида бўлганида жароҳат олган. Текширувлар натижасида унинг сон мушаклари тўқимасида қисман узилиш аниқланган эди. Дастлаб Мусиаланинг тикланиши учун 3–4 ҳафта керак бўлиши хабар қилинганди.
Журналист Керри Хаунинг маълумот беришича, «Бавария» футболчининг майдонга қайтишини тезлаштириш ниятида эмас. Шу сабабли у Чемпионлар лигасида «Арсенал»га қарши ва Бундеслигада «Фрайбург» билан бўладиган учрашувларни аниқ ўтказиб юборади.
Шу билан бирга, Мусиала 28 октябрь куни Германия кубоги доирасида «Магдебург»га қарши баҳсда ёки 31 октябрда Дортмунднинг «Боруссия»сига қарши учрашувда майдонга тушиши мумкин.
