«Бавария» дарвозабони Мануэль Нойер Чемпионлар лигасида «Арсенал»га қарши ўйин олдидан жамоавий машғулотларга қайтди.

BILD нашри маълумотига кўра, 40 ёшли футболчи душанба куни умумий гуруҳ билан машғулот ўтказган. У оёғидан олган жароҳати сабаб жамоасининг сўнгги иккита учрашувини ўтказиб юборган эди.

Мюнхенликлар эртага кечқурун Чемпионлар лигаси доирасида «Арсенал»га қарши муҳим учрашув ўтказади.

Нойернинг мазкур баҳсда иштирок этиш-этмаслиги бугунги якуний машғулотдан кейинги жисмоний ҳолатига қараб ҳал қилинади.

Агар дарвозабонда янги муаммолар юзага келмаса, тиббий штаб унга майдонга тушиш учун рухсат бериши кутилмоқда.

Нойернинг йўқлигида жамоа дарвозасини қўриқлаб келган Йонас Урбиг эса тажрибали посбон ўз вақтида тиклана олмаса, асосий таркибдаги ўрнини сақлаб қолади.

Шу билан бирга, «Бавария» ярим ҳимоячиси Жамол Мусиала чоршанба куни «Арсенал»га қарши ўйинда иштирок эта олмайди.

Футболчи мушак жароҳати туфайли сентябрь ойидан буён майдонга тушмаяпти. У жорий ой охирида сафга қайтишни мақсад қилган.