Аввалроқ Испаниянинг «Бетис» клуби бош мураббийи Мануэль Пеллегрини «Барселона»га қарши ўйиндан кейин ҳакамликни кескин танқид қилгани ҳақида хабар берган эдик.

Энди мураббий нохуш оқибатларга дуч келиши мумкин. Derbyderbyderby нашрининг хабар беришича, AESAF касаба уюшмаси йиғилиш ўтказмоқда. Унда Пеллегрини ҳакамларнинг ҳалоллигига шубҳа билдиргани сабабли унинг сўзларини Испания Қироллик футбол федерацияси (RFEF) Интизом қўмитасига тақдим этиш ёки этмаслик масаласи ҳал қилинади.

Регламентнинг 106-моддасига мувофиқ, «Манчестер Сити»нинг собиқ бош мураббийига бундай фикрлари учун 4 тадан 12 тагача ўйинга дисквалификация қилиш, шунингдек, 601 евродан 3005 еврогача жарима солиш жазоси таҳдид қилмоқда.

Чилилик мутахассиснинг ягона умиди — суд амалиётидаги аввалги прецедентлар. Ўтмишда Спорт маъмурий трибунали (TAD) ҳамда умумий юрисдикция судлари шунга ўхшаш баёнотларни қайта кўриб чиқиб, уларни фикр билдириш эркинлиги ҳуқуқидан фойдаланиш сифатида баҳолаган.