"ПСЖ" бош мураббийи Луис Энрике Чемпионлар лигасида "Барселона" устидан қозонилган ғалабадан (4:2) сўнг шошилинч хулоса чиқармасликка чақирди.
Парижликлар ва каталонияликлар ўртасидаги учрашув айни пайтда Европанинг энг кучли икки жамоаси тўқнашуви сифатида баҳоланди. Чемпионлар лигасининг амалдаги ғолиблари яна бир бор ўз кучини намойиш этиб, мавсум бошидан буён ўтказган аввалги 11 та учрашувининг барчасида ғалаба қозонган Ханс-Дитер Флик жамоасини мағлуб этишга муваффақ бўлишди.
"Биз аллақачон биринчи саватчадаги жамоаларга қарши иккита ўйин ўтказдик. Аммо шуни эслатиб ўтишим керакки, ўтган мавсумда ҳам ушбу босқичда худди шунча очко тўплагандик, бироқ якунда кучли саккизталикка кира олмагандик. Биз эътиборимизни кейинги учрашувларга қаратишимиз керак", — дея Энрикенинг сўзларини келтиради УЕФА матбуот хизмати.
"ПСЖ" 9 очко билан умумий босқич турнир жадвалида пешқадамлик қилмоқда. Ўтган мавсумда Лига 1 гранди 11-ўринни эгаллаган, аммо плей-оффнинг барча босқичларидан муваффақиятли ўтиб, кетма-кет иккинчи марта мусобақа ғолиби бўлган эди.
