«Реал» ярим ҳимоячиси Жуд Беллингемнинг меҳнатсеварлиги жамоадошларида катта таассурот қолдирмоқда. Бу ҳақда El Chiringuito хабар бермоқда.

Дастурнинг Чемпионлар лигасига бағишланган сонида журналист Маркос Бенито англиялик футболчи ҳар куни клубнинг Вальдебебас машғулот базасида 6–8 соат вақт ўтказишини маълум қилди.

Бенитонинг таъкидлашича, Беллингемнинг ўз ишига бўлган садоқати жамоадошларини ҳайратлантирмоқда. Унинг машғулотларга ажратаётган вақти клубдаги ўртача кўрсаткичдан анча юқори экани айтилмоқда.

Мадрид клуби бош мураббийи Жозе Моуриньо ҳам яқинда 23 ёшли футболчининг меҳнатсеварлигини юқори баҳолаган эди.

Беллингем жорий мавсумда Моуриньо жамоасининг асосий футболчиларидан бири бўлиб қолмоқда. У 11 та учрашувда 3 та гол урди ва 4 та голли узатмани амалга оширди.

Жаҳон чемпионатида ажойиб ўйин намойиш этган ва яқиндаги халқаро танаффусда ҳам ўзини кўрсата олган Англия терма жамоаси футболчиси «Реал» билан молиявий шартлари яхшиланган янги шартнома имзолаши кутилмоқда.