"Байер"нинг 20 ёшли ҳужумкор ярим ҳимоячиси Иброҳим Маза "Пари Сен-Жермен" қизиқишлари доирасига тушди. Бу ҳақда Topskills Sports UK хабар бермоқда.
Манба маълумотларига кўра, сўнгги вақтларда парижликларнинг футболчига бўлган қизиқиши сезиларли даражада кучайган. Клубда Маза ҳужумда ижодкорликни оширишга ёрдам бера олади, деб ҳисоблашмоқда.
Бироқ "ПСЖ"га футболчини қўлга киритиш осон бўлмайди. Чунки унинг ривожланишини "Арсенал", "Манчестер Сити" ва Мадриднинг "Атлетико" клублари ҳам кузатиб бормоқда.
Маза жорий мавсумда барча мусобақаларда саккизта учрашувда майдонга тушиб, учта гол урди ва учта голли узатмани амалга оширди.
Transfermarkt портали маълумотларига кўра, ярим ҳимоячининг бозор қиймати 50 миллион еврога тенг.
