Футбол бўйича Ўзбекистон Кубоги чоракфиналида “Навбаҳор”га қарши майдонга тушган “Ғазалкент” футболчилари хайрия аксиясида иштирок этди. Меҳмонлар учрашувни аутизмга чалинган болалар чизган расмлар туширилган махсус либосларда ўтказди.
Клуб матбуот хизматининг хабар беришича, мазкур ўйин учун тайёрланган либослар дизайнида аутизмли болалар учун ихтисослаштирилган таълим маркази тарбияланувчилари томонидан чизилган расмлардан фойдаланилган.
Маълум қилинишича, чекланган миқдорда ишлаб чиқарилган ушбу футболкалар савдосидан тушган барча маблағлар тўғридан-тўғри аутизмли болалар таълим марказининг ҳисоб рақамига ўтказилади. Футболкалар савдосидан тушган маблағлар аутизмли болалар таълим марказининг фаолиятини қўллаб-қувватлаш, зарур ускуналар ва ўқув материалларини харид қилишга йўналтирилади. Шунингдек, акция доирасида футболчиларнинг махсус либосларда майдонга тушиши марказ тарбияланувчилари чизган расмларни кенгроқ аудиторияга танитиш имконини ҳам берди.
Маълумот учун, мазкур учрашувда “Навбаҳор” футболчилари 3:1 ҳисобида ғалаба қозониб, Ўзбекистон Кубоги яримфиналига йўл олди.
