«Арсенал» бош мураббийи Микель Артета Чемпионлар лигаси умумий босқичининг 3-туридан ўрин олган «Бавария»га қарши учрашувдаги дуранг (2:2) ҳақида фикр билдирди.

«Биз бу натижани қабул қиламиз, аммо ундан қониқиш ҳосил қила олмаймиз, чунки ғалаба учун тайёрланган эдик. Учрашув бошиданоқ жамоамизнинг кайфияти, мақсад сари интилиши ва устунликка эришиш истаги кўриниб турди. Биз бу ерга келиб, «Бавария»га муаммо туғдиришни хоҳладик. Рақибни прессинг остида ушлаш ва ҳужум қилишни мақсад қилгандик. Айнан шуни амалга ошира олдик.

Дастлабки 25 дақиқада биз яхшироқ ўйнадик ва гол урдик. Афсуски, шу билан бирга Букайо Сакани жароҳат туфайли йўқотдик. Бу биз учун жиддий зарба бўлди.

Жамоа ажойиб вазминлик, характер ва ҳужумларни давом эттириш истагини намойиш этди. Захирадан майдонга тушган футболчилар ҳам ўйинга ўз ҳиссасини қўшди.

Ҳисобни тенглаштирганимиздан кейин жамоанинг муносабатини кўриш мумкин эди: биз тўпни назорат қилишни, яна олдинга боришни ва ушбу учрашувда ғалаба қозонишга ҳаракат қилишни истадик», — дея Артетанинг сўзларини келтиради The Guardian нашри.