Англияда "Манчестер Юнайтед" бош мураббийи Майкл Кэррикнинг ўрнига Антонио Конте тайинланиши мумкинлиги ҳақидаги муҳокамалар давом этмоқда.
Миш-мишларга кўра, "қизил иблислар" Чемпионлар лигасида "Комо"га 1:4 ҳисобида мағлуб бўлганидан сўнг Кэррик истеъфо ёқасига келиб қолган. Ҳозирда ишсиз бўлган Конте эса бир неча ҳафтадан буён унинг ўрнини эгаллашга асосий номзодлардан бири сифатида тилга олинмоқда.
"Конте каби мураббийнинг "Манчестер Юнайтед" хўжайинлари билан тинч-тотув ишлай олишига ишонмайман. Буни тасаввур қилишим қийин, чунки у аввалги клубларининг ҳеч бирида раҳбарият билан бундай муносабат ўрната олмаган.
"МЮ"да ҳам шунга ўхшаш ҳамкорликлар яхши натижа бермаган. Жозе Моуриньо ва Луи ван Гал мисолларини эслаш кифоя.
Клубда анчадан буён давом этаётган муаммо бор. 2024 йилда улар Эрик тен Хаг билан шартномани узайтиришди ва трансферлар учун маблағ ажратишди, аммо октябрда уни ишдан бўшатишди.
Кейинроқ Рубен Аморим билан ҳам шунга ўхшаш ҳолат юз берди. Энди клуб яна худди шундай вазиятга тушиб қолмоқда. Бироқ ҳозирча раҳбарият ўз ёндашувини яна кескин ўзгартиришга тайёр эканини кўрсатувчи белгиларни кўрмаяпман", — дея таниқли журналист Саймон Стоуннинг сўзларини келтиради BBC.
"Манчестер Юнайтед" Англия Премьер-лигасининг дастлабки еттита туридан сўнг турнир жадвалида 13-ўринни эгаллаб турибди.
