Дортмунднинг «Боруссия» клуби ярим ҳимоячиси Феликс Нмеча фаолиятини Англия Премьер-лигасида давом эттириши мумкин. Германиялик футболчининг хизматларига бир қатор топ-клублар қизиқиш билдирмоқда.
Журналист Экрем Конурнинг маълум қилишича, 26 ёшли ярим ҳимоячини ўз сафига қўшиб олишни «Манчестер Юнайтед», «Ливерпуль» ва «Тоттенхэм» режалаштирмоқда. Ушбу клублар Нмечанинг ўйинларини диққат билан кузатиб бормоқда.
Қайд этилишича, футболчининг амалдаги шартномасида товон пули 80 миллион евро этиб белгиланган. Мазкур банд келаси йилнинг июнь ойи охирига қадар амал қилади.
Нмечанинг «Боруссия» билан амалдаги шартномаси эса 2030 йил 30 июнгача мўлжалланган.
Эслатиб ўтамиз, Феликс Нмеча 2023 йил июль ойидан буён Дортмунд клуби шарафини ҳимоя қилиб келмоқда.
