«Ливерпуль» клуби собиқ ҳужумчиси Диогу Жота хотирасига бағишланган китоб нашр этилишини эълон қилди. Бу ҳақда мерсисайдликлар ижтимоий тармоқлардаги расмий саҳифалари орқали маълум қилди.
«Қалбларимизда абадий» деб номланган китобда португалиялик футболчининг ҳаёт йўли, профессионал фаолияти ва футбол оламида қолдирган мероси ҳақида ҳикоя қилинади.
Эслатиб ўтамиз, Диогу Жота 2025 йил 3 июль куни Испанияда содир бўлган йўл-транспорт ҳодисаси оқибатида фожиали тарзда ҳаётдан кўз юмган эди.
Ҳалокат Испаниянинг Самора провинциясидаги Паласиос-де-Санабрия муниципалитети ҳудудидан ўтувчи А-52 автомобиль йўлининг 65-километрида содир бўлган.
Ҳодиса вақтида Lamborghini автомобилида Диогу Жота ва унинг укаси Андре Силва бўлган. Андре ҳам профессионал футболчи бўлиб, Португалиянинг «Пенафиел» клуби шарафини ҳимоя қилган.
