Франциянинг «Лион» клуби Европа лигаси доирасида «Хоффенхайм»га қарши учрашув олдидан бир нечта мухлисининг Германия чегарасида ушлаб қолингани юзасидан расмий баёнот берди.

Маълум қилинишича, Германия федерал полицияси томонидан тўхтатилган мухлислар Европа лигаси умумий босқичининг 3-туридаги «Хоффенхайм» — «Лион» (3:0) учрашувини стадиондан томоша қилиш имкониятидан маҳрум бўлган.

«Клуб ушбу учрашувга Германиянинг маҳаллий ҳокимият органлари билан ҳамкорликда узоқ вақт тайёргарлик кўрди. Биз уларнинг бу борадаги фаолиятини алоҳида эътироф этмоқчимиз. Ташкилий жараёнда иштирок этган барча томонлар ўйинни хавф даражаси паст бўлган тадбир сифатида баҳолаган эди.

Бироқ барча учун кутилмаган ҳолат юз берди. Германия федерал полицияси чегарада «Лион»нинг бир нечта мухлисини ушлаб қолди. Энг ажабланарлиси, ҳозиргача бу қарорнинг сабаблари тушунтирилмаган. Натижада мухлисларимиз учрашувга бора олмади.

«Лион» УЕФА ва Германия федерал ҳокимият органларидан мазкур воқеанинг барча тафсилотларига тўлиқ ойдинлик киритишни талаб қилади. Биз мухлисларимизнинг норозилиги ва ҳафсаласи пир бўлганини тўлиқ тушунамиз.

Клуб ўз мухлисларининг эркин сафар қилиш ва севимли жамоасини қўллаб-қувватлаш ҳуқуқини ҳимоя қилишда уларга ҳар томонлама ёрдам беради», — дейилади «Лион»нинг расмий баёнотида.