«Брайтон» бош мураббийи Фабиан Хюрцелер жамоасининг жорий мавсум Англия Премьер-лигаси чемпионлиги учун курашиш имкониятлари ҳақида фикр билдирди.

Матбуот анжуманида немис мутахассисидан «Брайтон»ни чемпионликка даъвогар жамоалар қаторига киритиш мумкинми, деб сўралди.

«Йўқ! Биз ҳар бир учрашувга алоҳида ёндашяпмиз ва асосий эътиборни ўйинимиз сифатига қаратяпмиз.

Кечагина футболчиларим билан суҳбатлашдим. Уларнинг фикрлаш тарзи менга жуда ёқади. Улар шундай дейишди: «Биз фақат натижалар ҳақида ўйлашни истамаймиз. Асосий эътиборимизни ўз ўйинимизга, қандай қилиб янада кучлироқ бўлишимиз ва қайси жиҳатларда ўсишимиз мумкинлигига қаратмоқчимиз. Шунда натижалар ҳам ўз-ўзидан келади».

Мавсум якунида эса қайси ўринни эгаллаганимиз ва аслида қандай натижага эришишимиз керак бўлгани ҳақида гаплашишимиз мумкин», — деди Хюрцелер.

Қайд этиш жоиз, «Брайтон» Англия Премьер-лигасининг дастлабки етти туридан кейин 16 очко жамғариб, мусобақа жадвалида учинчи ўринни эгаллаб турибди.

Жамоа пешқадам «Манчестер Сити»дан беш очкога ортда қолмоқда.