"Рома" бош мураббийи Жан Пьеро Гасперини Италия А Серияси доирасида "Кальяри" устидан қозонилган 4:2 ҳисобидаги ғалабани шарҳлар экан, жамоадаги чарчоқ ва клуб тарбияланувчиларининг ҳиссаси ҳақида гапирди.
"Албатта, бугун айрим қийинчиликларга дуч келдик. Рақиб ҳужумда ўзини тетикроқ ҳис қилди ва бизга муаммолар туғдирди. Шунингдек, ҳар бир ўйинда ярим ҳимоя марказида бир хил футболчилардан фойдаланяпмиз ва чарчоқ ўз таъсирини кўрсата бошлаяпти. Шунинг учун ғалабамиз янада қадрли, чунки ҳар бир футболчи ўз ҳиссасини қўшди", — деди Гасперини DAZN телеканалига берган интервьюсида.
Мураббий, шунингдек, Дибала ва Коне йўқлигида ўйнаш "Рома" учун осон эмаслигини таъкидлади. Бироқ у кучли рақиб устидан қозонилган ғалаба билан фахрланиш мумкинлигини айтди.
Гасперини римликларнинг дастлабки икки голини урган клуб тарбияланувчилари Эмануэле Лулли ва Никколо Пизиллига ҳам алоҳида мақтов билдирди.
"Булар ажойиб йигитлар. Ёшлар жамоасида клубни жуда яхши кўрадиган ва унинг асосий жамоасида дебют қилишни орзу қиладиган футболчилар доимо бўлади. Улар ҳали жуда ёш, албатта, иқтидорли ҳам. Бугун Лулли боши билан гол урди. У кечаги машғулотда айнан шу элементни машқ қилган эди, чунки бу унинг ўйинидаги энг кучли жиҳатлардан бири эмас".
"Рома" чемпионатда 21 очко билан учинчи ўринда бормоқда.
