«Лацио»нинг ғалабали юриши давом этмоқда. Римликлар Италия чемпионатида «Сассуоло»ни сафарда 6:2 ҳисобида мағлуб этиб, кетма-кет бешинчи ғалабасини қўлга киритди. Голлардан бири машҳур Муссолини фамилиясига эга Флориани Муссолини томонидан киритилди. Учрашувдан сўнг у ўз ҳиссиётлари билан ўртоқлашди.
«Ҳиссиётларимни таърифлаб бера олмайман, улар жуда кўп эди. Мухлисларимиз кўз ўнгида гол уриш — буни сўз билан ифодалаш қийин.
Мен дарҳол мухлислар бағрига отилишни истадим, аммо ҳакамни кўриб, хавотирга тушдим: мабодо гол бекор қилинса-чи? Худога шукр, гол ҳисобга олинди.
Жамоа сифатида олдинга интилишда давом этишимиз керак. Ҳозир турнир жадвалига қарашнинг вақти эмас. Бу муваффақият бошимизни айлантиришига йўл қўймаймиз.
Мураббий диққатимизни жамлашга ёрдам беряпти. Шу боис кейинги ўйинга ҳам ғалабага бўлган худди шундай иштиёқ билан чиқамиз», — дея футболчининг сўзларини келтирмоқда Cittaceleste.it нашри.
