"Наполи" ярим ҳимоячиси Станислав Лоботка жароҳат сабаб 4–8 ҳафтага сафдан чиқиши мумкин.
31 ёшли словакиялик футболчи Италия чемпионатининг 9-турида "Монца"га қарши учрашувда (4:1) оёғидан жароҳат олган.
"Наполи" расмий сайтининг хабар беришича, тиббий текширувлар Лоботканинг чап тўпиғидаги суяклараро боғламлар шикастланганини аниқлаган. Шунингдек, ташқи тўпиқ боғламларидан бирида енгил жароҳат қайд этилган.
Футболчи аллақачон тикланиш жараёнини бошлаган. Клуб унинг қачон майдонга қайтишини маълум қилмаган.
Бироқ Tuttomercatoweb нашрига кўра, Лоботканинг соғайиши 4 ҳафтадан 8 ҳафтагача давом этиши мумкин.
Жорий мавсумда словакиялик ярим ҳимоячи "Наполи" сафида 12 та ўйин ўтказиб, 1 та гол урган.
