Фарғонанинг “Нефтчи” клуби яримҳимоячиси Икромжон Алибоев Элит Осиё Чемпионлар Лигаси доирасидаги иккита учрашувни ўтказиб юборади. Бу ҳақда ОФК Тартиб-интизом ва этика қўмитаси расман маълум қилди.
Осиё футбол конфедерацияси (ОФК) Тартиб-интизом ва этика қўмитасининг 28 октябрь, чоршанба куни қабул қилган қарорига кўра, футболчи мусобақанинг 2-туридан ўрин олган “Ан-Насср”га қарши кечган учрашувда рақибга нисбатан ўта қўпол ҳаракат қилгани ва тўғридан-тўғри қизил карточка олгани учун ОФК Тартиб-интизом кодексининг 47-моддасига асосан икки ўйинга четлатилган.
Алибоев ушбу жазонинг автоматик бир ўйинлик қисмини 26 октябрь, душанба куни бўлган “Ал-Иттиҳод”га қарши кечган баҳсда ўтаган. Шу сабабли у 2 ноябрь куни Эроннинг “Трактор” клубига қарши сафар учрашувида ҳам фарғоналикларга ёрдам бера олмайди.
Бундан ташқари, ОФК интизомий регламентининг 4.1.2-моддасига мувофиқ, футболчига 2000 АҚШ доллари миқдорида жарима белгиланди. Ушбу маблағ қарор етказилган кундан эътиборан 30 кун ичида тўланиши лозим.
Эслатиб ўтамиз, “Нефтчи” жорий йилнинг 12 октябрь куни меҳмонда “Ал-Наср”га 1:3 ҳисобида имкониятни бой берган эди. Айни пайтда фарғоналиклар 3 очко тўплаган ҳолда турнир жадвалида 10-поғонани банд этиб турибди.
