Футзал бўйича Ўзбекистон миллий терма жамоасига янги бош мураббий тайинланди. Ўзбекистон футзал федерацияси Ижроия қўмитаси қарорига кўра, ушбу лавозим Баҳодир Аҳмедовга ишониб топширилди.
Аввалги бош мураббий, испаниялик Хосе Мария Мендес саломатлиги билан боғлиқ сабабларга кўра вазифасидан кетган эди. Шундан сўнг федерация маҳаллий ва хорижлик мутахассислар номзодини ўрганиб чиқди ҳамда миллий футзални яхши биладиган Баҳодир Аҳмедовни танлади.
Баҳодир Аҳмедов ҳақида
Баҳодир Йўлдошбоевич Аҳмедов 1976 йил 9 сентябрда Тошкент вилоятининг Чирчиқ шаҳрида туғилган.
У футболчилик фаолиятини Чирчиқнинг "Сплав", "Электрокимёсаноат" ва "Солиқчи" жамоаларида бошлаган. Кейинчалик "Юнусобод" ДЖҚА, "Ардус" ва "Строитель Зарафшон" клубларида ўйнаб, Ўзбекистон чемпиони бўлган.
Мураббийлик фаолиятида "Максам-Чирчиқ"ни мамлакат чемпионати совриндорлари қаторига олиб кирган. "Жиззах-Кентекс" билан эса Ўзбекистон чемпионлигини қўлга киритган.
Терма жамоадаги ютуқлари
Аҳмедов аввал ҳам Ўзбекистон миллий терма жамоасини бошқарган. Унинг раҳбарлигида футзалчиларимиз Осиё кубогида икки марта бронза медалига сазовор бўлган.
Шунингдек, Ўзбекистон терма жамоаси 2021 йилги жаҳон чемпионатида гуруҳ босқичидан муваффақиятли ўтиб, плей-оффга йўл олган.
Федерация маълумотига кўра, Баҳодир Аҳмедов билан миллий терма жамоани 2028 йилги Осиё чемпионати якунлангунига қадар бошқариш бўйича келишувга эришилган.
