Британиялик телевидение бошловчиси Пирс Морган «Манчестер Юнайтед»нинг «Челси»дан учраган мағлубиятидан (0:2) сўнг жамоа футболчилари ва бош мураббий Майкл Каррикни кескин танқид қилди.

Морган ўйиндан кейин мухлислар қаршисида турган футболчилар, жумладан, кўз ёшларини тия олмаган сардор Бруну Фернандеш акс этган видеога муносабат билдирди.

«Агар мен «МЮ» бош мураббийи бўлганимда, бундай аянчли саҳналарга чек қўярдим. Футболчиларга йиғлашни ва кечирим сўрашни бас қилишни, ўзларини эркаклардек тутиб, ниҳоят ғалаба қозонишни бошлашни айтардим», — деб ёзди Морган.

Шунингдек, у Каррикнинг жамоа ўйинни назорат қилгани, аммо вазият уларга қарши ўзгаргани ҳақидаги фикрига ҳам эътироз билдирди.

«Сиз 0:2 ҳисобида ютқаздингиз! Каррик вазиятни умуман тушунмаётгандек ва ўз ишини уддалай олмаяпти. «Юнайтед»га психолог эмас, Контедек қаттиққўл мураббий керак», — дея қўшимча қилди Морган.