Ёдингизда бордир, газетамизнинг аввалги сонларидан бирида футболимиз келажаги сифатида эътироф этилган, аммо кутилганидек, натижаларга эришолмаётган ёшларимиз ҳақида фикр юритгандик.
Аниқроғи, кузатувларимиз доираси Алексей Евстафеев мураббийлик қилган ўсмирлар терма жамоамиз (1994 йилда туғилган футболчилардан иборат) аъзоларини қамраб олганди. Бу сафар эса улардан бироз ёши каттароқ футболчиларимизга эътибор қаратамиз. Яъни Марат Кабаев қўл остида 2010 йилги Осиё чемпионатида иштирок этиб қайтган баъзи йигитларимиз ҳақида фикр билдирмоқчимиз. Дарҳақиқат, ўша терма жамоада ҳам ниҳоятда истеъдодли ёшлар жам бўлишганди. Таркибнинг бир неча аъзолари ҳаттоки, миллий жамоа кўрикларида ҳам иштирок этишмоқда. Масалан, Владимир Козак, Дилшод Жўраев, Егорь Кримец... Биз пастроқда тилга олмоқчи бўлаётган йигитлар ҳам ўз тенгдошларидан ҳар томонлама ажралиб туришарди. Энди эса уларнинг кўплари олий лига (айримлари эса афсуски, биринчи лига) жамоаларининг оддий ва ўртамиёна ўйинчиларига айланиб боришмоқда. Буни сира хоҳламасдик, албатта. Аминмизки, сиз ҳам. Тўғри, улғайиш даврида футболчиларнинг феъл-атворлари ўзгарувчан бўлади ва бу ҳол уларнинг келажакларига салбий таъсир қилишини ҳам кўп бора кузатганмиз. Бизнинг мақсадимиз битта - қуйидаги мақола орқали уларни «уйғотиш»га интилиш.
Абдумуталлиб Абдуллаев
Амплуаси: ярим ҳимоячи
Барчага яхши маълум, Кабаев тузган терма жамоада Абдумуталлибнинг ўрни беқиёс эди. Ўнг қанот бўйлаб ҳужумга отланганида, унча-мунча рақибни шошириб қўядиган футболчи марказга ёриб киришда, шерикларига аниқ «пас» беришда ҳам беназирдек кўринганди. Умуман, терма жамоамизнинг ўйини айнан Абдуллаев атрофига қурилганди, десак ҳам муболаға бўлмайди. Афсуски, чемпионат якунига етгач, Абдумуталлиб футболимиздан бутунлай йўқолиб қолди. Йўқ, «йўқолиб қолди» деганда, маъжозий ўхшатишни назарда тутмаяпмиз. Чиндан ҳам, «заявка»ларни минг марта текшириб чиқсангиз ҳам, футболимизда ушбу исм-фамилияли ярим ҳимоячини тополмайсиз. Факт шуки, футболчининг ўзи бор ва у ҳозирда «Гулистон» клуби шарафини ҳимоя қилмоқда. Йўқолгани - унинг исми-шарифи ва туғилган йили. Ажабланманг, иқтидорли ўйинчи бугунги кунда (қанчалик қизиқарли бўлмасин)1989 йилнинг 4 октябрида туғилган Нодирбек Тешабоев сифатида фаолият юритмоқда. Лекин унинг Зибо-2010дагидек ёрқин ҳаракатларини анчадан бери кузатмадик. Эҳтимол, бирдагина 5 ёш «улғайиб» қолган футболчи бундай кутилмаган ўзгаришдан сўнг «адаптация» жараёнида муаммоларга дуч келаётгандир?! Билмадик... Билганимиз шуки, футболимизда бундай тушунарсизликлар ҳалигача мавжуд экан, эртами-кеч, барибир, ёқимсиз оқибатларга олиб келаверади.
Муносабат. - Дарҳақиқат, Нодирбек охирги пайтларда кам ўйин ўтказмоқда. Сабаби шуки, унда соғлиғига боғлиқ кичик муаммо бор эди. Лекин охирги 10 кундан буён умумий машғулотларга киришиб, ҳозирча тўлиқ бўлмасада, бир бўлимда жамоамизга қўлидан келганча ёрдам бермоқда. Аслида унинг футболчилик салоҳияти, майдонни кўра олиш хусусияти аъло даражада. Лекин баъзида қулай имкониятлар туғилганда, шошқалоқликка йўл қўяди ва натижада кўзлаган мақсадига етолмайди. Бу - менинг шахсий фикрим. Ўйлашимча, Тешабоев мен тилга олган муаммоларни бартараф эта олса, нафақат «Гулистон»даги, балки ундан-да юқорироқ орзуларига ҳам эришади. Зоҳид Нурматов («Гулистон» клуби ёрдамчи мураббийи).
Фаррух Нурлибоев
Амплуаси: ҳимоячи
Терма жамоани сардор сифатида майдонга бошлаб тушиб, ҳимоядаги ишончли ҳаракатлари билан мухлислар меҳрини қозонган Фаррух кутилган даражада «ўсмади». Ваҳоланки, «Олмалиқ» клуби тарбияланувчиси бир-икки йилдан сўнг Шквирин жамоасида асосий «фигура»лардан бирига айланади, деган комил ишонч бор эди бизда. Қолаверса, етакчи мутахассисларимиз ҳам Нурлибоев мисолида миллий жамоамиз ҳимояси келажагидан кўнгилни тўқ қилаётгандилар. Чунки марказий ҳимояда тўп сурувчи Фаррух ундан талаб қилинадиган кўпгина омиллар - баланд бўй, бақувват гавда, чидам ва қатъият, совуққонлик, маҳорат каби хусусиятларни ўзида мужассам этганди. Лекин қандайдир сабаблар туфайли қитъа биринчилиги якунланганидан бироз вақт ўтиб, Нурлибоевнинг ўйинида кескин пасайиш кузатилди ва у вақт ўтгани сари «Олмалиқ»нинг захира ўриндиғига мустаҳкамроқ жойлашиб бораверди. Охир-оқибат, «кончилар» Нурлибоевни биринчи лига иштирокчиси - «NBU-Осиё» клубига (ижара асосида) юборишдан ўзга илож топа олишмади.
Муносабат. - Фаррухнинг истеъдодли ҳимоячи эканлигига шубҳа қилмайман. Қолаверса, унинг ҳозирги ўйинлари ҳам чакки эмас. Менга маълум бўлишича, Нурлибоев «Олмалиқ»да тўп суриб юрган кезлари жиддий жароҳатланган. Аниқроғи, тўқнашув оқибатида бироз мия чайқалишини орттириб олган. Бундай ҳолат кимнинг бошидан ўтган бўлса, яхши биладики, кишининг тўла соғайиб кетишига маълум вақт талаб қилинади. Хуллас, Фаррух айни кунда соғлиғини бутунлай тиклаб олди, ҳисоб. Унинг ўйин амалиётисиз қолиб кетмаслиги учун «Олмалиқ»қа таклиф билан чиқиб, ижарага олгандик. Ижара шартномаси шу мавсум охиригача тузилган. Энг муҳими, Нурлибоев вариантида адашмаганимиз бугунги кунда ўз исботини топмоқда. У спорт формасини тиклагани сари тобора сифатли ўйин кўрсатиб, ишончимизни оқламоқда. Руслан Шоймардонов («NBU-Осиё» клуби директори).
Жавлон Гусейнов
Амплуаси: ҳимоячи
Бу ҳимоячининг фаолият йўли Нурлибоевникидан деярли фарқ қилмайди. Иккиси ҳам «Олмалиқ» клубида яратилган шароит ва ёшларга бўлган эътибор туфайли Ўзбекистон терма жамоаси (U-19) таркибидан жой олди, майдонда бир-бирини тўлдириб тўп сурди. Қизиғи шундаки, иккови ҳам Шквирин талаб қилган даражага чиқолмай, «Олмалиқ»нинг асосий таркибига киролмади. Энг қизиғи, Жавлон ҳам айни кунда худди дўсти Фаррух каби «NBU-Осиё» клубида тўп суриб, биринчи лигада тажриба оширмоқда. Уларнинг битта фарқи шуки, Гусейновнинг трансфер ҳуқуқи «Олмалиқ»қа тегишли эмас. Агар бу футболчилар ўсишдан тўхтаб қолмай, фақат олдинга интилганларида эди, биз шу кунларда марказий ҳимоячиларнинг ажойиб жуфтлигини кўрган бўлармидик...? Тўғри, бундан 3 йил аввал Жавлоннинг имкониятлари ва кўрсаткичлари Фаррухникига қараганда, бироз пастроқ эди. Аммо у «Интилганга толе ёр», деган қадимий нақлга амал қилганида, чемпионатимиздаги исталган клубнинг бирида тўп суриши ҳеч гап эмасди.
Муносабат. - Гусейнов ҳам худди Нурлибоев сингари жароҳатдан эндигина қутулди. Мана, сўнгги ўйинларимизда мунтазам қатнашиб, ҳатто голлар уряпти. Ўйлашимча, Гусейнов ҳозирги ҳолатида ҳам олий лигамиздаги ҳар қандай жамоада ўйнаб кетишга қодир. Дарвоқе, унга таклифлар етарлича. Эҳтимол, кейинги мавсумдан «планка»ни баландроқ олар? Унгача эса биз билан тузилган профессионал шартномага амал қилади. Умуман, юқоридаги икки футболчининг келажаги ёрқин бўлишига шахсан мен ишонаман. Улар биринчи лигада шунчаки, вақт ўтказиш учун тўп суришмаяпти. Спорт формаларини керакли даражага чиқариб олишса, бас. Руслан Шоймардонов («NBU-Осиё» клуби директори).
Виктор Мочалов
Амплуаси: дарвозабон
Ҳуқуқий жиҳатдан аслида «Бунёдкор» клубига тегишли Викторга осон тутиб бўлмайди. Чунки у ўз клубининг асосий таркибида ўйнашни истаса, Игнатий Нестеров ва Мурод Зуҳуров каби тажрибали киперлар билан рақобатлашишига тўғри келади. Шу боис Мочалов жорий мавсум аввалида «Навбаҳор» таркибига қўшилди - ижара шартномаси асосида. Қайсидир маънода унинг бу қарорини тўла қўллаб-қувватлаш мумкин. Зеро, ёшларнинг ўйин амалиётисиз ўсиш у ёқда турсин, ҳатто олдинги ҳолатларини сақлаб қолишлари ҳам мушкул вазифа. Бироқ Виктор «Навбаҳор»да ҳам ўзи истаган даражада фаолият юритмаяпти. Наманганда ҳам анчагача захира ўриндиғини «иситиб» ўтирган умидли кипер ниҳоят, сентябрнинг охирига келиб, аста-секинлик билан майдонда кўриниш бера бошлади. Шояд, шу билан унинг ишлари юришиб кетса... Жумладан, «Навбаҳор»нинг «Олмалиқ» клубига қарши ўйинида Мочалов тўлиқ иштирок этиб, ўз дарвозасидан 3 марта тўп олиб чиқди. Лекин голларнинг ҳаммасида уни айблаш тўғри эмас. Қисқаси, ҳаммасини рисолага келтириб олиш учун Мочаловда ҳали имконият бор. Фақат, улардан оқилона фойланиш қолди, холос.
Муносабат. - Мочалов борасида «Навбаҳор» клуби билан тузилган ижара шартномаси йил охирида тугайди. Ўзингизга маълум, клубнинг кўплаб тарбияланувчилари турли жамоаларда тажриба оширмоқдалар. Клубимиз мутахассислари ўтказилган ҳар бир турдан сўнг (хоҳ олий, хоҳ биринчи лига бўлсин) ёшларимизнинг ўйинлари, ҳаракатлари ва натижаларини бирма-бир таҳлил қилиб чиқишади. Викторнинг кўрсаткичлари ҳам доимо диққат марказимизда. Яқинда мураббийларимиз айнан у ҳақда гаплашиб олишди. Яъни Викторнинг ўйинлари қониқтирса, у қишки йиғинда жамоамиз сафига қўшилади. Аслида бу футболчидан умидимиз катта. Аниқроқ айтганда, Мочаловнинг келажаги кўп жиҳатдан унинг ўзига боғлиқ. Баҳодир Мирзаев («Бунёдкор» клуби матбуот котиби).
Темурхўжа Абдухолиқов
Амплуаси: ҳужумчи
Ёшлар ўртасидаги Осиё чемпионати Темурхўжа учун айни муддао бўлди. Чунки у айнан шу турнирда ном қозонди, тажриба оширди. Тўғри, терма жамоанинг умумий натижаларини кўнгилдагидек, деб бўлмасди, аммо Темурхўжа ўтказилган камсонли ўйинлардаёқ тўпурарлик қобилияти билан кўпчилик назарига тушишга улгурди. Турнир якунлангач, у ўзини юртимиздаги энг илғор клублардан бири «Бунёдкор» сафида ҳам намойиш қилиши мумкин эди. Бироқ футболчи ўйин амалиётисиз қолиб кетаётганини айтиб, жамоасини ўзгартиришга қарор қилди ва «Пахтакор» таклифига розилик берди. Афсуски, унинг «Пахтакор»даги ишлари ҳам унчалик юришмади. Эҳтимол, «юришмади», дейиш ноўриндир? Лекин гуллаб-яшнаб кетди, деб ҳам айтолмаймиз. Ҳозирда Абдухолиқовнинг «Пахтакор»дан ҳам кетиши аниқроқ бўлиб турибди. «Насаф» клубига қарши кечган чемпионат баҳсида футболчилар ўртасида жанжал чиқаргани учун айбланиб, қизил карточкага лойиқ топилган форвард интервьюларидан бирида Венгриянинг «Пушкаш» клубидан таклиф борлигига шаъма қилди. Балки унинг очилмаган қирралари хорижга йўл олганидан сўнг очилиб кетар? Умид қиламиз...
Муносабат. - Темурхўжа ва «Пахтакор» клуби ўртасида тузилган шартнома жорий йил охирида ўз кучини йўқотади. Агар у жамоадан кетишни ният қилган бўлса, бу ишни бемалол амалга ошириши мумкин. Зеро, «Пахтакор» мутасаддилари футболчиларнинг шахсий қарорларига доимо ҳурмат билан қараб келишган. Лекин аминманки, унинг жамоадошлари ва мураббийлар штаби билан муносабатларида ҳеч қандай муаммо йўқ. Афсуски, «Насаф»га қарши ўйиндаги ҳолат ҳақида ҳеч нарса деёлмайман. Чунки бу - клубнинг ички масалалари сирасига киради. Бундай муаммолар одатда ёпиқ тарзда ҳал қилинади. Бекзод Назаров («Пахтакор» клуби матбуот котиби).
Исроил РАҲИМОВ
