Бирлашган Араб Амирликлари терма жамоаси кеча Малайзия билан ўртоқлик учрашувини ўтказди ва 3:1 ҳисобида ғалаба қозонди. Хитойнинг Шенжень шаҳрида бўлиб ўтган ўйинда Аҳмад Халил ва Али Мабхут (икки марта) томонидан киритилган голлар Али Маҳдий шогирдларига ғалабани тақдим этди.

БАА 5 октябрь куни Лаос билан ҳам ўртоқлик ўйинида майдонга тушиб, 2:0 ҳисобида ғалаба қозонганди. Амирлик жамоаси 15 октябрь куни Гонконгга қарши Осиё кубоги-2015 саралаш баҳсини ўтказади.

"Ҳозирча барчаси биз учун яхши кечмоқда. Лаос билан ўйинда бўлгани каби тактика танладик ва иккита ўйин давомида барча футболчиларга ўйнаш имкониятини бердим. Ушбу баҳслар ўртоқлик мақомида бўлса-да, ушбу ўйинлар натижаси биз учун муҳим аҳамиятга эга. Гонконгга қарши ўйин олдидан яхши тайёргарликка эга бўлиб олиш эса энг муҳими", дейди БАА бош мураббийи.

"Ҳозирги ўйинимиздан қониқиш ҳосил қиляпман. Гонконг билан ўйин биз учун катта синов вазифасини ўтайди. Олдимизда ҳали қиладиган ишлар кўп. Гонконг билан ўйингача камчиликларни бартараф этишга улгурамиз", дейди Али Маҳдий.

БАА Осиё кубоги саралашининг "Е" гуруҳида 6 очко тўплаган ҳолда 1-ўринни эгаллаб турган бўлса, Гонконг ҳисобида 4 очко мавжуд.