Бугун бутун Осиё бўйлаб U-19 Осиё чемпионати саралаш сўнгги тур учрашувлари ўтказилмоқда. Биз 2014 йили Мьянмада ўтадиган U-19 Осиё чемпионати барча иштирокчилари номини билиб оламиз.

Ҳозиргача, Мьянмадан ташқари, Уммон, Шимолий Корея, БАА ва Вьетнам термалари финал босқичи йўлланмасига эга. Саралаш баҳслари ҳали давом этмоқда, қолган 11 иштирокчи номи ҳам бугун маълум бўлади.

Саралаш баҳслари, аввал хабар қилинганидек, тўққиз гуруҳда давом этмоқда. Тўққиз гуруҳ ғолиби, шунингдек, тўққиз гуруҳда энг яхши натижани кўрсатган олтита иккинчи ўрин эгаси ОЧга чиқади. Ўзбекистон U-19 ёшлар терма жамоаси «А» саралаш гуруҳида иштирок этмоқда. Евстафеев шогирдлари дастлабки 3та ўйинда ғалаба қозонди.

Бугун, 12 октябрь куни Ўзбекистон U-19 саралаш доирасидаги сўнгги, Қатарга қарши ўйинни ўтказади. Ушбу ўйин натижасида «А» гуруҳидан ким нечанчи ўринни эгаллагани ҳолда финал босқичига чиқишини аниқлаб беради. Айни вақтда Қатар ва Ўзбекистон ёшлари ҳисобида 9 очкодан бор, тўплар нисбатига кўра Қатардан биздан устун.


Агар бугунги Қатар – Ўзбекистон учрашувида Қатар ғалаба қозонса, Ўзбекистон бошқа гуруҳлардаги натижаларга қараши керак. Дуранг натижа эса Ўзбекистонни 2-ўрин билан ОЧга чиқишини таъминлайди. Агар бугунги Қатар – Ўзбекистон учрашуви, ўзбекистонликлар режалаштираётганидек, Ўзбекистон ғалабаси билан тугаса – масала ҳал.

Бугунги саралаш баҳсларининг энг сўнггиси Доҳада, Тошкент вақти билан 21:00да бошланади: ҚАТАР – ЎЗБЕКИСТОН. Айнан Қатар – Ўзбекистон учрашуви 2014 йилги U-19 Осиё чемпионатининг сўнгги иштирокчилари номини аниқлаб беради.

Ўзбекистон ва Қатар миллий терма жамоалари ўзаро 10 марта майдонга тушишган. Улардан 4таси Осиё Кубоги саралаш ва финал босқичида бўлган. Ёшлар ва ўсмирлар терма жамоалари доирасида эса Ўзбекистон ва Қатар терма жамоалари шу кунгача жами 4 марта тўқнаш келишган. U-19 даражасида Ўзбекистон ва Қатар термалари бир марта – 2002 йилги Осиё чемпионати гуруҳ босқичида тўқнаш келишган.

Драматик курашларга бой бўлган ўша баҳс 5:4 ҳисобида Виктор Борисов шогирдлари ғалабаси билан тугаган. Қатар ёшларига қарши ўша ўйин Александр Гейнрихнинг «Нас не догонят» ёзуви туширилган либосда югуриши билан ҳам ёдда қолган.

U-16 даражасида Қатар ва Ўзбекистон термалари уч марта тўқнаш келишган – 1 ўйин дуранг, қолганида томонлар 1 мартадан ғалаба қозонган. Ўзбекистон ва Қатар ўсмирларининг илк учрашуви ОЧ-1994 финал босқичида бўлган. Доҳада бўлган мусобақада Қатар 6:1 ҳисобида ғалаба қозонган. Кейинги ўйин ОЧ-2002 финал босқичи гуруҳ баҳсига тўғри келган. Бу сафар Ўзбекистон 1:0 ҳисобида ғалаба қозонган. 3-ўйин ОЧ-2004да бўлган, 2:2 ҳисоби қайд этилган. Ўзбекистон голлари Лутфулла Тўраев ва Анвар Бердиев («Пахтакор» тарбияланувчиси)га ёзилган.

Бугун, 12 октябрь куни Доҳадаги «Ал-Араби» стадионида ўтадиган ҚАТАР – ЎЗБЕКИСТОН ўйини U-16 ёки U-19 саралаши доирасидаги илк тўқнашувдир.