Қатар миллий терма жамоаси кеча Осиё кубоги-2015 саралаши доирасида Яманни қабул қилди ва йирик 6:0 ҳисобида ғалаба қозонди.
Учрашувнинг 4 ва 24-дақиқаларида урилган голлар эвазига майдон эгалари 2та тўп фарқи билан ҳисобда олдинга чиқиб олишганди. Биринчи бўлим тугашига яқин ўйинни бошқариб бораётган ўзбекистонлик ҳакам Валентин Коваленко яманлик Эссам ал-Воравийга қизил карточка кўрсатди. Бир киши кам бўлиб қолган Яман иккинчи бўлим ўз дарвозасидан яна 4та тўп ўтказиб юборди. Учрашувда Халфан Иброҳим хет-трикка эришди.
Мазкур ўйинда Коваленкога қанотларда Рафаэль Ильясов ва Маъмур Саидқосимов ёрдам беришди. Тўртинчи ҳакам вазифасини эса Азиз Асимов бажарди.
Ушбу ғалабадан кейин Қатар 6 очко билан мусобақада йўқотишларсиз бораётган Баҳрайнга етиб олди. Малайзия ҳисобида 3 очко мавжуд бўлса, Яман ҳамон очко жамғармаган.
| № | Жамоа | Ўйин | Ғалаба | Дуранг | Мағ-т | Т-Н | Очко |
|---|---|---|---|---|---|---|---|
| 1 | Қатар | 3 | 2 | 0 | 1 | 8-1 | 6 |
| 2 | Баҳрайн | 2 | 2 | 0 | 0 | 3-0 | 6 |
| 3 | Малайзия | 2 | 1 | 0 | 1 | 2-3 | 3 |
| 4 | Яман | 3 | 0 | 0 | 3 | 1-10 | 0 |
