Бугун Қувасойдаги марказий стадионда Ёшлар лигаси 22-туридан ўрин олган “Нефтчи” – “Сўғдиёна” жамоалари ўринбосарлари ўртасида ўйин бўлиб ўтди.

Учрашув кутилганидек мезбонларнинг ҳужумлари билан бошланди. Илк дақиқалардан олдинга ташланган майдон эгалари 9-дақиқада ҳисобни очишди. Жарима майдончасига кириб борган Умид Қодиров жиззахлик посбонни ожиз қолдирди - 1:0.  Кейинги дақиқаларда ҳам “Нефтчи” ўйинчилари бир қатор қулай имкониятга эга бўлишди. Аммо ҳар гал омад мезбонлардан юз угираверди. 21-дақиқага келиб ўйинда ҳисоб тенглашди. Абдураҳмоновнинг узоқ масофадан берган зарбаси дарвоза туридан жой олди - 1:1.      

29-дақиқада Нодир Ашурматов катта тезликда жарима майдончасига кириб борган Зокировни чалиб йиқитди. Бу вазиятда ҳакам меҳмонлар дарвозаси томон пенальти белгилади ва дарвозабонга сариқ карточка кўрсатди. Пенальтини эса Иззатбек Ғаниев аниқ амалга оширди - 2:1. Орадан ҳеч қанча ўтмай, меҳмонлар ҳисобни тенглаштиришди. Яна ўша Абдураҳмоновнинг узоқ масофадан тепган тўпи дарвоза туридан жой олди - 2:2.

35-дақиқада меҳмонларнинг ажойиб ҳужумини Абдураҳмонов кучли зарбаси билан якунига етказди - 2:3. Биринчи бўлим якунланиш арафасида Умид Қодиров яна катта тезликда жарима майдончасига кириб бориб зарба берди. Унинг зарбасини Ашурматов қайтарди. Қайтган тўпни Отабек Зокиров дарвозага йўллаб қўйди - 3:3.

Иккинчи тайм ҳам биринчисидан фарқ қилмади.  Мезбонлар рақиб дарвозаси олдида бир нечта хавфли ҳужумларни ташкил этишди. Аммо ҳар гал омад етишмади. Меҳмонлар ҳам вақти вақти билан олдинга ташланиб туришди. Учрашувнинг 67-дақиқасида ҳисоб ўзгарди. Умид Қодиров жамоадошлари томонидан бошланган ҳужумни самарали якунлади - 4:3.

Шу куни мухлислар голлар шоусига гувоҳ бўлишди. 80-дақиқада “Нефтчи” футболчилари меҳмонлар ўйинчисини ўз жарима майдончалари ичида чалиб йиқитишди. Ҳакам бу сафар майдон эгалари даровзаси томон пенальти белгилади. Ўн бир метрли жарима тўпини Абдураҳмонов аниқ амалга ошириб, “покер”ни расмийлаштирди - 4:4.

Ўйининг сўнгги дақиқаларида мухлислар яна иккита гол кўришди. Аввалига Отабек Зокиров дарвозабон билан бирга бир вазиятга чиқиб бориб, дарвозани аниқ нишонга олди - 5:4.  Орадан ҳеч қанча ўтмай, “Нефтчи” посбони қўпол хатога йўл қўйди. Бундан эса Рашидов унумли фойдаланиб ҳисобни тенглаштирди - 5:5.

Шундай қилиб ўйин жанговор дуранг билан якун топди. Ҳар иккала жамоа бир очкога эга бўлишди. 

«Нефтчи» (Фарғона) – «Сўғдиёна» (Жиззах) – 5:5. 217 томошабин.
Ҳакамлар: А.Раҳимов (Андижон), Д.Ҳакимов, С.Раҳмонов, Ш.Матисаев
Назоратчи: В.Валицкий (Тошкент).
Голлар: У.Қодиров (9, 61), И.Ғаниев (30-пенальти), О.Зокиров (43, 88) – А.Абдураҳмонов (21, 33, 35, 78-пенальти), С.Мелиев (89).
Огоҳлантиришлар: Ш.Ҳакимов (44) – Н.Ашурматов (29).