Ўсмирлар ўртасидаги ЖЧнинг "С" гуруҳидаги дастлабки ўйин бўлиб ўтди. Хорватия ўсмирлари Марокашдан ташриф буюрган тенгдошлари билан баҳс олиб боришди.

Биринчи бўлимни жуда чиройли ўтказган африкаликлар танаффусга қадар Хорватия дарвозасига 3та гол уришга муваффақ бўлишди. Иккита гол Карим Ачахбар ҳисобига ёзилган бўлса, учинчи голни Жаъдий хорватлар дарвозасига киритди.

Европаликлар иккинчи бўлимда ўз ўйинларини топиб олишга интилишди ва улар Марокаш дарвозасига бир маротаба йўл топа олишди. Роберт Мурич ўйиннинг 59-дақиқасида жамоасининг мусобақадаги илк голини киритди. Ўйин якунига қадар ярим соатдан ошиқроқ вақт бўлса-да, Иван Гудалж шогирдлари ҳисобни бошқа қисқартира олишмади.

"D" гуруҳи баҳсида эса Африканинг яна бир терма жамоаси ғалаба қозонди. Тунисликлар Венесуэлани 2:1 ҳисобида мағлуб этишди.

Учрашувнинг 25-дақиқасида Тунис ҳисобни очди. Бироқ орадан кўп ўтмасдан тунислик Акрут майдондан четлаштирилди. Иккинчи бўлим бошида африкаликлар иккинчи голни уришган уларнинг ғалабасида муҳим роль ўйнади. Венесуэла эса орадан кўп ўтмасдан ҳисобни биттага қисқартирдию, бироқ рақиб дарвозасига бошқа йўл топа олмади.

Тошкент вақти билан соат 21:00да Панама-Ўзбекистон, Россия-Япония учрашувлари бошланади

Ўсмирлар ўртасидаги Жаҳон чемпионати
"С" гуруҳи. 1-тур
ХОРВАТИЯ - МАРОКАШ - 1:3
Голлар: Роберт Мурич (59) — Карим Ачахбар (28, 40), Жаъдий (45+1)

"D" гуруҳи, 1-тур
ТУНИС - ВЕНЕСУЭЛА - 2:1
Голлар: Жбелий (25), Бин Ларбий (47) — Хосе Маркез (51)
Четлатиш: Акрут (38)