Бирлашган Араб Амирликларида бўлиб ўтаётган U-17 Жаҳон чемпионатида терма жамоамиз ғалабаси барчамизга хуш кайфият, ёшларимизга эса ўз кучларига ишонч берди, десак адашмаймиз.

Ўзбекистон футбол мухлислари клуби томонидан ташкил этилган мухлислар гуруҳи бугун миллий терма жамоамиз футболчиси Азиз Ҳайдаров иштирокидаги “Ал-Васл” – “Аш-Шабоб” ўйинига ташриф буюришди. “Ал-Васл” ҳисобни очганига қарамасдан Азиз Ҳайдаров жамоаси аввалига пенальти эвазига ҳисобни 1:1 кўринишига келтиришган бўлса, ўйин тугашига 10 дақиқа қолганида Ҳайдаров жуда чиройли тарзда гол уриб, жамоасини олдинга олиб чиқди, 1:2. Ўйинга қўшиб берилган 4 дақиқанинг биринчисида ҳамюртимиз жамоасининг 3-тўпини ҳам киритиб, учрашувда “дубл” қайд этди! “Аш-Шабоб” 3:1 ҳисобида ғалаба қозонди.

Ўйин тугагач, Ҳайдаров ўз футболкасини Ўзбекистондан ташриф буюрган Абдулло исмли ёш мухлисга совға қилди ва ўзбекистонлик мухлислар билан эсдалик учун суратга тушди. Ўз навбатида ишқибозларимиз ҳам Ҳайдаров иштирокидаги кейинги ўйинга ҳам албатта боришга ваъда беришди.

Ўйин тугаши билан “Дубай Спорт-1” канали стадионда кўплаб мухлисларимиздан интервьюлар олишди.

Ушбу кунги футболга ташриф Ўзбекистон футбол мухлислари клуби ҳамда “Аш-Шабоб” жамоаси фан-клуби билан ҳамкорликда ташкил этилди. Ўйин сўнгида мухлислар бир-бирларини қутлаган ҳолда шарф ва футболкалар билан тақдирлашди.

Ўзбекистонлик мухлисларни  21 октябрь куни Ҳинд океанида кемада сайр, балиқ ови ва кеч соат 20:00да Ўзбекистон ва Марокаш иштрокидаги муҳим учрашув кутиб турибди. Олға Ўзбекистон, олға ёшлар, олға ватандошлар!