УЕФА Президенти Мишель Платини Осиё ва Африкадан ЖЧда иштирок этувчи мамлакатлар сонини оширишнинг ғайритабиий йўлини таклиф қилди - Мундиал иштирокчилари сонини 40та етказиш. Хабарингиз бор, куни кеча ФИФА раҳбари Йозеф Блаттер Европага бериладиган йўлланмаларнинг Осиё ва Африкага нисбатан адолатсиз эканини таъкидлаганди.

Бунга жавобан интервью берган Платинининг айтишича, "бу тизимга ЖЧ-2018даёқ ўтилиши мумкин". Агар таркибида 5тадан жамоа бўлган 8та гуруҳ тузилса, ҳисоб-китоблар шуни кўрсатдики, бор-йўғи ҳар 3 кунда бир марта ўйнашга тўғри келади холос.

"Блаттернинг фикрига қўшиламан, бизга кўпроқ Африка ва Осиё терма жамоалари керак. Аммо буни Европадан жамоаларни камайтириш ҳисобига эмас, яхшиси иштирокчилар сонини 40тага етказиш билан ҳал этиш мумкин. Шунда бизда яна икки Африка, икки Осиё ва бир Океания аъзоси, шунингдек яна битта Европа вакилини қўшиш имконияти пайдо бўлади", - деган Платинининг сўзларини эълон қилган The Times.