Бугун Қувасойдаги марказий стадионда Ёшлар лигаси 24-туридан ўрин олган “Нефтчи” – “Пахтакор” ўринбосарлари ўртасида ўйин бўлиб ўтди.

Учрашувни мезбонлар шиддат билан бошлаганига қарамай, ҳисобни очиш “Пахтакор” футболчиларига насиб этди. 16-дақиқада ҳимоядаги хатодан Темур Ҳакимов унумли фойдаланиб ҳисобни очди. Орадан бир дақиқа ўтиб, Иззатбек Ғаниев мувозанатни тиклади.

31-дақиқада Раҳматов ва Махситалиевлар ҳакам томонидан қизил карточка билан жазоланишди. Биринчи бўлим 1:1 ҳисобида интиҳо топди.

Иккинчи бўлим ҳам биринчисидан деярли фарқ қилмади. Ҳар икки жамоа  ҳам эҳтиёткорлик билан тўп сурди.  Дастлабки дақиқаларда мезбонлар бироз устунлик қилишди.  Кейин эса ўйин тенглашди.

Шуни айтиш жоизки, шу куни майдон эгаларида гол киритиш учун бир нечта хавфли вазиятлар вужудга келди. Аммо ҳар сафар омад “Шерлар”га кулиб боқди.  Ўз навбатида “Пахтакор” ўринбосарларида ҳам голга тортадиган ҳолатлар бўлди.

Шундай қилиб, қизиқарли тарзда кечган ўйинда дуранг натижа қайд этилди ва томон ўз ҳисобларига бир очкодан ёзиб қўйишди.