Куни кеча "Динамо" стадионида "Пахтакор" ва "Бунёдкор" фахрийлари Тошкент шаҳар чемпионати доирасида майдонга тушишди.
Учрашувда "Пахтакор" фахрийлари шарафини Нўъмон Ҳасанов, Шуҳрат Раҳмонқулов, Равшан Бозоров, Рустам Дўрмонов, Жасур Абдураимов, Фурқат Эсонбоев ва Мурод Алиев сингари собиқ футболчилар ҳимоя қилишди. "Бунёдкор" сафида эса Сергей Лушан, Азамат Абдураимов, Анатолий Хутин, Алишер Бозоров каби яқин ўтмиш юлдузлари тўп тепишди.
Шу куни ҳар икки жамоа аъзолари ажойиб ва чиройли ўйин намойиш қилиб, стадионга йиғилган мухлисларга футболдан завқланиш имкониятини тақдим этишди. Бу футболчилар бир неча йиллар аввал стадионларга мухлислар тўлишига сабабчи бўлишарди.
Кескин курашлар остида кечган беллашувда "Пахтакор" фахрийлари 3:2 ҳисобида зафар қучишди. Дўрмоновнинг дубли ва Ҳасанов томонидан киритилган тўп фахрийларимизга ғалаба келтирди. Лекин энг муҳими, ўйиндаги натижа эмас, балки мухлисларнинг собиқ ўйинчилар маҳоратидан яна бир бор баҳра олишгани бўлди.
