Жорий йилнинг 26-30 октябрь кунлари Малайзия пойтахти Куала-Лумпур шаҳрида ўтказилган ўсмирлар ўртасидаги “Параосиё ўйинлари – 2013” мусобақаларида Ўзбекистон шарафини муносиб ҳимоя қилган спортчиларимиз юртимизга қайтиб келди.
Тошкент халқаро аэропортида паралимпиячиларимиз тантанали кутиб олинди.
Куала-Лумпурдаги мусобақаларда истеъдодли ёш спортчи Илҳомжон Рихсибоев найза, диск ва ядро улоқтиришда рақибларини катта устунлик билан ортда қолдириб, учта олтин медални қўлга киритди.
– Нуфузли мусобақаларда Президентимиз ва халқимизнинг юксак эътибори ва ишончини доимо ҳис этиб турамиз, – дейди Параосиё ўйинлари ғолиби И.Рихсибоев. – Бу бизга Ватанимиз шаънини улуғлашда катта куч ва ғайрат бағишлайди. Келгуси мақсадим – Бразилияда ўтадиган XV ёзги Паралимпия ўйинларига йўлланмани қўлга киритиш ва унда муносиб иштирок этиш.
Параосиё ўйинларининг енгил атлетика баҳсларида жаҳон чемпионати кумуш медали совриндори Дониёр Солиев узунликка сакрашда, Фаррух Мирзақулов 100, 200 ва 400 метрга югуришда иккинчи ўринни эгаллади.
Сузиш мусобақаларида қатнашган Кирилл Паньков ҳам мухлислар ишончини оқлади. Ўтган йили Лондонда ўтказилган XIV ёзги Паралимпия ўйинлари тарихига Осиё рекордчиси сифатида кирган ҳамюртимиз Параосиё ўйинларида ҳам маҳорат кўрсатди. 100 метрга чалқанча сузишда белгиланган масофани биринчи босиб ўтган К.Паньков олтин медални қўлга киритиб, Осиё рекордини янгилади.
Терма жамоамизга яна бир жуфт олтин медални дзюдочилар келтирди. 60 килограмм вазн тоифасида саралаш учрашувларидан муваффақиятли ўтган Шуҳрат Бафоев ҳал қилувчи баҳсда эронлик Ризо Ғуломий устидан соф ғалабага эришиб, шоҳсупанинг энг юқори поғонасига кўтарилди. Вазни 66 килограмм бўлган дзюдочилар ўртасидаги финалда Нурбек Бердиёров Жанубий Корея вакили Ли Жун Хуни мағлубиятга учратиб, олтин медалга сазовор бўлди.
Параосиё ўйинлари дастуридан жой олган пауэрлифтинг мусобақаларида ўз вазн тоифасида юқори натижаларга эришган спортчиларимиздан Фарҳод Умрзоқов ва Искандар Турсунбоев бронза медали билан тақдирланди.
Осиё қитъасининг 42 давлатидан 2,5 минг нафарга яқин паралимпиячи қатнашган “Параосиё ўйинлари – 2013” мусобақаларида Ўзбекистон спортчилари шижоати ва матонати, ғалабага бўлган интилиши билан мухлису мутахассислар ҳурматини қозонди.
