"Милан" президентининг Сильвио Берлусконининг қизи, айни пайтда клуб директори ҳисобланувчи Барбара "россонер"лар тизимида бир қатор ўзгартиришларни амалга оширмоқчи, деб ёзади ANSA.

Барбара отаси билан учрашувда клуб вице-президенти Адриано Галлиани ва жамоа бош мураббийи Массимилиано Аллегриларни ишдан олиш кераклигини маълум қилган.

Берлускони қизининг фикрича, "Милан"нинг сўнгги вақтларда трансферлар учун пул сарфлагани, аммо тўғри инвестициялар қилинмагани учун шундай йўл тутилиши керак. Бундан ташқари, 11 тур ўтиб миланликлар 12 очко тўплашган ҳолда Чемпионлар лигаси йўлланмасини берадиган ўриндан 16 очко, қуйи лигага йўл очадиган хавфли зонадан 3 очко узоқда туришибди.

Юқорида номи келтирилган нашр исми саналганларнинг истеъфосига қатьий ишонган ҳолда, ҳатто бўлажак вице-президентнинг номини ҳам маълум қилади: жамоа собиқ сардори Паоло Мальдини.