Машҳур футболчи Дэвид Бекхэмнинг тўнғич ўғли отасининг изидан боришга қарор қилди. 14 ёшли Бруклин Бекхэм “Манчестер Юнайтед” клубининг ўсмирлар академиясига қабул қилинди.
Бундан олдин Бруклин "Лос-Анжелес Гэлакси" болалар жамоаси учун ўйнар эди, бу пайтда унинг отаси асосий таркибда чиқарди. Бекхэмнинг иккинчи ўғли ўн ёшли Ромео эса “Арсенал” клубининг мактабида шуғулланади. У шу жамоанинг ашаддий мухлиси ҳисобланади, деб ёзади "Спорт-экспресс".
Қайд этиб ўтамиз, 38 ёшли Дэвид Бекхэм дунёдаги энг машҳур футболчилардан бири ҳисобланади. Жорий мавсумда у Франциянинг “ПСЖ” жамоаси билан чемпионлик унвонини қўлга киритди ва ўзининг спортдаги фаолиятига якун ясади. Ўтган йили Бекхэм "Лос-Анжелес Гэлакси" таркибида MLS кубогини қўлга киритганди.
Дэвид Бекхэм ўз фаолияти давомида "Манчестер Юнайтед" таркибида олти марта Англия чемпиони бўлган. Машҳур футболчи “Қизил иблислар” билан бирга Чемпионлар лигасида ғолиб чиққан ва бир марта Мадриднинг “Реал” клуби билан Испания биринчилигини қўлга киритган.
