"Челси" бош мураббийи Жозе Моуриньо медаллар учун курашдаги имкониятларни ошириш мақсадида клуб раҳбариятидан қишки трансфер мавсумида ҳужумчи сотиб олиш учун рухсат олди.
Моуриньо ҳужумчилар Фернандо Торрес ва Самуэль Это`Онинг АПЛда бор-йўғи биттадан гол уришганидан, клубнинг учинчи рақамли ҳужумчиси Демба Ба эса 2013 йил 2 мартидан буён бирор марта рақиб дарвозасини ишғол қила олмаётганидан хафсаласи пир бўлган.
"Челси" устози жамоа ҳужум чизиғи устида қаттиқ бош қотирмоқда ва аллақачон номзодлар устида ишлашни бошлаган. Уларнинг аксарияти Европа лигаларида тўп сурмоқда ва Чемпионлар лигаси учун аллақачон рўйҳатдан ўтказиб бўлинган ва бу мавсум "Челси" сафида ўйнай олмайди. Шунга қарамай, хабар муаллифи Daily Mail`нинг қайд этишича, бу ҳолат "Челси" учун тўсиқ бўла олмайди.
Қайд этиш жоиз, мавсум охирига қадар "Эвертон"га ижарага берилган Ромелу Лукаку шартнома белгиланганидек, қишда Лондонга қайта олмайди.