Нигериялик Санди Олисе Африка футболи юлдузларидан бири ҳисобланади. У ўз терма жамоаси сафида 1994 ва 1998 йилги ЖЧларида иштирок этган бўлса, 1996 йилги олимпиадада чемпионликни қўлга киритган.

Бугун Нигерия ўсмирлар терма жамоаси БААда давом этаётган ЖЧнинг ярим финалида Швецияга қарши баҳс олиб боради. ФИФА расмий сайтига интервью берган Санди Олисе Ўзбекистон ўсмирлар терма жамоаси ҳақида жуда илиқ фикрларни билдириб ўтди.

"Ўзбекистон ўсмирлар терма жамоаси нимчорак финалда Гондурасга ютқазиб қўйган бўлса-да, менда жуда катта таассурот қолдирди. Гуруҳ босқичидаги ўйинлар давомида улар жуда яхши шаклланган жамоа эканини исботлашди. Улар тактик ўйинлари орқали рақибларини қийнаб қўйишди. Шунингдек, ўзларининг жисмоний жиҳатдан кучли эканини кўрсатишди. Уларнинг ҳар бир футболчиси майдондаги ўз вазифасини яхши ҳис қиларди. 1/8 финалда уларнинг муҳим ўйинчиси майдонга тушмаган бўлса-да, Ўзбекистон турли ўзгаришлар орқали етакчи футболчининг ўрнини билдирмасликка ҳааркат қилди. Аммо улар ютқазишди", дейди Олисе.

Санди бугунги ўйинда ватандошларининг имкониятларига баҳо бераркан, ушбу ёшда олдиндан башорат қилиб бўлмаслигни таъкидлади.

"Албатта, Нигерия чемпион бўлса, жуда зўр бўларди. Бунинг учун уларда барча имконият бор. Аммо футболдан нима бўлишини олдиндан ҳеч қачон билиб бўлмайди. Масалан, Ўзбекистон терма жамоаси Гондурасга ютқазади деб ҳеч ҳам ўйламагандим", дейди Олисе.