Ўзбекистон XXII миллий чемпионати сўнгги туридан жой олган «Гулистон» — «Қизилқум» жамоалари баҳси марказий ўйинлардан бири саналса ажаб эмас. Бу учрашув амалдаги мавсумнинг иккинчи омадсиз жамоаси номига ойдинлик киритиб бериши билан ҳам аҳамиятлидир.

  Агар бу жамоаларнинг чемпионатларимиздаги ўзаро учрашувлари тарихига назар ташласак, устунлик «Қизилқум» футболчилари томонида эканлигини билиб олиш қийин эмас. Ҳозиргача улар бешта учрашувда ўзаро куч синашган бўлиб, шулардан учтасида навоийликларнинг қўли устун келган. Бир ўйинда омад гулистонликларга кулиб боққан бўлса, яна бир учрашувда жамоалар ўзаро очко бўлишиб олганлар.   Ўзаро ўйинларда дарвозаларга киритилган тўплар бўйича ҳам «Қизилқум» вакиллари олдинда — 10:2.   Навоийликлар ўз тарихидаги йирик ғалабалардан бирига ҳам айнан «Гулистон» жамоаси билан кечган баҳсда эришган. 2003 йил 17 августда Гулистонда ўтказилган ўйинда «Қизилқум» футболчилари мезбонлар дарвозасига жавобсиз еттита гол уришган — 7:0.   Бу жамоаларнинг ўзаро ўтказилган ўйинларида ҳозиргача кончилар 10 та очкони ўзлариники қилиб олган бўлса, гулистонликлар атиги 4 очкога эгалик қилганлар.   Афсуски, амалдаги мавсумнинг илк туридан жой олган баҳсда «Қизилқум» футболчилари ўз майдонида «Гулистон»га 0:2 ҳисобида имкониятни бой берганди. Ўтган давр мобайнида навоийликлар жамоаси таркиби тубдан ўзгарди. Иккинчи даврада аста-секин ўз ўйинини топиб олган Юрий Лукин шогирдлари эндиликда мутлақо бошқача кайфиятда майдонга  тушишмоқда.    Ҳозирда «Қизилқум» таркибида бирорта ҳам жиддий йўқотиш йўқ. Аксинча, мезбонлар — «Гулистон» жамоаси ўз майдонида таркибида бир қатор жиддий йўқотишлар билан майдонга тушишга мажбур. Жумладан, 8 ноябрь куни бўладиган ўйинда   жамоа етакчиларидан Раббим Ҳасанов, Акбар Саттаевлар гулистонликларга ёрдам бера олишмайди.   Ишонамизки, «Қизилқум» жамоаси аъзолари чемпионат охирги баҳсида илк турдаги мағлубият аламини олиш билан биргаликда элитада кейинги мавсумда ҳам тўп суриш имкониятларини ўз қўлларида сақлаб қоладилар.     Қуйида бу жамоаларнинг ўзаро учрашувларида қайд этилган натижалари билан танишинг:
2000 йил 16-тур, 4 июнь «Гулистон» — «Қизилқум» — 0:0 23-тур, 14 август «Қизилқум» — «Гулистон» — 1:0   2003 йил 13-тур, 18 июнь «Қизилқум» — «Гулистон» — 2:0 18-тур, 17 август «Гулистон» — «Қизилқум» — 0:7   2013 йил 1-тур, 2 март «Қизилқум» — «Гулистон» — 0:2...