Бугун XXII футбол бўйича миллий чемпионатимизнинг сўнгги 26-тури учрашувлари бўлиб ўтади. Футбол мухлислари ҳам бугун энг ҳаяжонли ва қизиқарли учрашувларга гувоҳ бўлишса ажаб эмас. Шуниси диққатга сазоворки бугун шунингдек жорий мавсум чемпиони ҳам маълум бўлади.

Қаршининг "Насаф" футбол клуби мухлислари ҳам ўз севикли жамоасини сафарда қўллаб-қувватлаш учун бугун эрта тонгда Олмалиқ шаҳрига қараб йўлга чиқишди.

"Насаф" ПФК раҳбарияти томонидан уларга алоҳид автобус ажратилди. Мухлислар клуби фаоллари Ўктам Узоқов ва Зиёдулла Сафаровлар мухлислар гуруҳига раҳбарлик қилишиб, айни пайтда йўл юришда давом этишмоқда.

Бу йилги чемпионатда жамоа бош мураббийи Рўзиқул Бердиевнинг ва клуб раҳбарларининг саи ҳаракатлари эвазига жамоа мухлисларида ҳам ўз севикларига бўлган ишонч анча ортди. Жамоада азалий бўлган ўзига хос характер қайта тикланди. Айниқса октябрь ойи жамоа учун сермаҳсул бўлди. Рўзиқул Бердиев ва жамоа сардори Артур Геворкянлар октябрь ойи лауреатлари бўлишди. Ҳозирги пайтда чемпионат турнир жадвалини бошқариб бораётган "Бунёдкор" жамоасидан бор йўғи бир очко орқада қолаётган "Насаф"нинг ҳатто чемпион бўлиш учун имконияти сақланиб қолаяпти.

Ана шулар туфайли жамоа мухлисларида катта умид бор. Улар бугун Олмалиқдаги стадионда жамоага далда бўлишмоқчи. Ўз ўрнида "Насаф" жамоаси ўйинчилари ҳам мухлисларни хурсанд қилиш ниятидалар, улар ўйинга ҳар қачонгидан пухта тайёргарлик кўришган.

Биз сайтимиз номидан "Насаф" жамоасига ва мухлисларига бугунги ўйинда катта зафарлар тилаб қоламиз!