Октябрь ойида футзал бўйича Ўзбекистон чемпионати 1-босқич 1-тур учрашувлари старт олди. Тур учрашувлари бу қадар ёрқин ва қизиқарли ўтишини кўпчилик кутмаган эди. Чемпионатнинг бошидаёқ жамоалар Ўзбекистон футзали мухлисларига ҳақиқий совға тақдим эта олишди.
Қувонарли томони, анъанавий етакчилар қаторига Бухоро вилоятининг Когон шаҳри шарафини ҳимоя қилувчи «Когон» жамоаси ҳам қўшилди. Ўтган мавсум тўпурари Дилшод Раҳматов ва терма жамоага номзод Мақсуд Файзуллаев билан ўз таркибини кучайтирган когонликлар турни кўтаринки кайфиятда ўтказишди.
Айни вақтда, мамлакатнинг энг кучли футзал клубларидан бири — «Ардус»нинг нисбатан ишончсиз ўйини деярли барчани ҳайрон қолдирди. Бундан ташқари, сўнгги бир неча йилдан бери клуб шарафини ҳимоя қилиб келган бир қатор машҳур ўйинчилар ҳам «Ардус»да йўқ эди. Шундан келиб чиқиб, жамоа таркиби ўзгариши сабаблари ва клубнинг истиқбол режалари билан ҳақида билиш мақсади «Ардус» клуби президенти Жаҳонгир Усмоновга мурожаат қилдик. Бир вақтнинг ўзида Ўзбекистон футзал ассоциацияси вице-президенти ҳам ҳисобланган Усмонов суҳбат давомида миллий терма жамоа ва умуман футзал ривожи борасида ҳам қизиқарли маълумотларни маълум қилди.
— Октябрда футзал бўйича Ўзбекистон чемпионати 1-босқич 1-тур учрашувлари бўлиб ўтди. Янги мавсум иштирокчиларининг ўйинлари сизда қандай таассурот қолдирди?
— Мавсум старти нафақат менда, балки футзалнинг бошқа ихлосмандларида ҳам яхши таасссурот қолдирди. Янги чемпионат жуда қизғин бўлиши ҳозирданоқ маълум бўлиб улгурди. Агар ҳар бир жамоа ҳақида алоҳида тўхталадиган бўлсам, Қаршининг «Дўстлик-AIN» жамоаси ўйинлари қувонтирди – жамоа илк бор чемпионатда иштирок этаётганига қарамай ёрқин ва сифатли ўйин кўрсатди. Ушбу жамоа ташкил этилиши билан мусобақа иштирокчилари географияси ҳам кенгайди. Энди Ўзбекистон чемпионатида Қаршидан ҳам жамоа бўлади, бу шаҳарда эса аъло даражадаги спорт зали бор. Чемпионат турларидан бирини айнан ўша ерда ўтказиш режамиз бор.
Етакчилар ҳақида тўхталадиган бўлсам, «Максам-Чирчиқ» таркибини кучайтирди ва ушбу жамоа мавсум давомида яхши ўйин кўрсатишини тахмин қилиш мумкин. «Бунёдкор» бир қадар кучсизланган, бироқ, умид қиламанки, бу жамоа «ўз сўзини айта олади». «Локомотив» эса таркибда йиғилган ўйинчилари ва уларнинг савияси бўйича энг кучли жамоа. «Локомотив»нинг катта қисмини миллий терма жамоа аъзолари ташкил этади. Шунинг учун ҳам ушбу жамоа аъзолари яхши жисмоний ҳолатда кўришни хоҳлардик. Бунинг учун эса машғулотлар жараёнига нисбатан изчил ва профессионал ёндашув керак бўлади.
«Нафис» ва «Строитель-Зарафшон» жамоалари эса ўзининг кучсиз ўйини билан хафсалани пир қилди. Самарқандда ҳам, Зарафшонда ҳам футзал ўйнаш учун барча шароитлар бор, бироқ у ерда иш анча ёмон олиб бориляпти.
Албатта, Андижоннинг «Турон-С» жамоасидан ҳам нисбатан мазмунли ўйинлар кутамиз. Ушбу турда жамоа сезиларли равишда кўп очко йўқотди. «Пахтакор»дан ҳам яхши натижалар кутамиз. Жамоа бир неча йилдан бери бирга тўп сураётган ёш ўйинчилардан ташкил топган. Ҳозирги вақтда «Пахтакор»нинг икки нафар ўйинчиси миллий терма жамоага номзод ҳисобланади ва бу, менинг фикримча, эътиборга молик натижа.
Бухоронинг «Когон» жамоаси учун шубҳасиз хурсандман. Мавсум бошлангунига қадар жамоа Мақсуд Файзуллаев ва Дилшод Раҳматов каби ўйинчилар билан ўз таркибини кучайтирди. Раҳматов, ўзингизга яхши маълум, ўтган йилги Ўзбекистон чемпионати тўпурари ҳисобланади. Шу билан бирга «Когон» маҳаллий ўйинчиларни ҳам эсдан чиқариб қўяётгани йўқ. Бунинг натижаси эса очиқ кўриниб турибди – чемпионати биринчи туридан сўнг жамоа иккинчи ўринни эгаллаб турибди.
— Мусобақа давомида кўрдикки, сиз президенти ҳисобланган «Ардус» клуби таркиби сезиларли ўзгарган. Бунинг сабаби нимада?
— Бу жуда долзарб ва муҳим масала. Афсуски, агар ёш ўйинчиларни тарбиялаш ва етиштириш билан шуғулланаётган «Пахтакор»ни ҳисобга олмаса, бирор бир жамоа ёшларга етарлича эътибор қаратаётгани йўқ. Жамоаларнинг аксарияти ўз таркибларини бошқа клубларнинг танилиб улгурган, барқарор ўйинчилари билан тўлдиришга ҳаракат қилмоқда. Айни вақтда ёшларни тарбиялаш масаласи энг охирги ўринда қолмоқда. Албатта, мавсум учун ўз олдига катта вазифалар қўйиш яхши ва тўғри. Бироқ фақат тайёр ўйинчилар билан ишлаш ва ёшларга қаратмаслик ортидан жамоалар узоқ вақт барқарор ишлай олмайди. Агар бу иш бугун бошланмаса, эртага кеч бўлиши мумкин. Шунинг учун ҳам «Ардус», натижани қурбон қилиб бўлса-да, янги мавсум старти арафасида ёш ўйичилар учун қабул эълон қилди ва таркибни 95 фоизга янгилади. Бунда миллий терма жамоани ҳам ёддан чиқармаслик керак. Биз 2016 йилни мақсад қилиб ишламоқдамиз – Осиё чемпионатида мувафаққиятли иштирок этиб, Колумбияда ўтказиладиган жаҳон чемпионати йўлланмасини қўлга киритмоқчимиз. Бироқ ўша вақтга бориб ҳозирги таркибнинг 50 фоизи, ёши сабаб, мусобақаларда иштирок эта олмайди. Хулоса қилиб айтганда, истиқбол учун ишлаймиз. «Ардус» олдида чемпионат учун вазифалар қўйилмаган. Шу ерда қайд этишни истардимки, миллий терма жамоанинг ҳозирги барча ўйинчилари «Ардус» мактабидан чиқишган. Биз ёшлар билан ишлашда давом этамиз, бироқ бошқа жамоалар ҳам миллий терма жамоа учун истеъдодли ўйинчиларни етиштиришга ҳаракат қилишларини истардик.
— Мавсум бошланиши арафасида «Ардус» ёш футзалчиларни жамоага қабул қилиш ҳақида эълон қилганди. Кейинги шундай қабул қачон бўлади?
— Бу борадаги ишлар бутун мавсум давомида олиб борилади. Эълондан сўнг бизга жуда кўп қўнғироқлар бўлди. Бу футзалга қизиқиш борлигидан дарак беради. Бор-йўғи истеъдодли йигитларни аниқлаб, уларни қўллаб-қувватлаб туриш керак. Қайд этишим жоиз, танловлар фақат тошкентлик спортчилар ўртасида ўтказилмайди. «Ардус» таркибидан Ўзбекистоннинг исталган ҳудудида истиқомат қилувчи фуқаро ўрин олиши мумкин. Агар бизга маъқул келган вилоятлик ўйинчининг Тошкентда яшаши қийин бўлса, биз унга ўз вилоятидаги клубларга тавсия қилишимиз мумкин. Шундай қилиб, спортчилар сони ошади ва рақобат ўсади.
— Жорий мавсум жамоага бош мураббий этиб миллий терма жамоанинг собиқ ўйинчиси Николай Одушев тайинланди. Мураббий ўзгариши сабаби нимада?
— Мураббий ўзгаришига сабаб, Бахтиёр Тоғаев футзалдаги фаолияти билан бир вақтда, футбол бўйича Аёллар ва Биринчи Лига баҳсларида назоратчи ҳам ҳисобланади. Бир неча ишни бир вақтда олиб бориш унга ҳам мураккаб бўлди ва шу сабаб биз халқаро тоифадаги спорт устаси, кўп карра Ўзбекистон чемпиони ва бир неча бор Осиё чемпионатлари совриндори бўлган Николай Одушевни «Ардус»га бош мураббий сифатида таклиф этиш ҳақидаги қарор қабул қилдик. Бу инсон кўп йиллар давомида Ўзбекистон шарафини халқаро майдонларда муносиб ҳимоя қилган. Унинг ўйин тажрибаси жуда ҳам катта. «Ардус»даги фаолият унга мураббий сифатида ўсишга ёрдам беради. Янги ўйинчиларни тарбиялаш билан бир вақтда биз янги футзал мураббийини ҳам тайёрлаймиз. Одушев футзал бўйича Ўзбекистон терма жамоаси бош мураббийи Баҳодир Аҳмедовнинг ёрдамчиси ҳисобланади ва «Ардус»даги фаолияти давомида у ўзига зарур бўлган амалиётга эга бўлади.
— Ўзбекистонда футзал келажагини қандай кўрасиз?
— Мамлакатимиз иқтидорларга бой. Ишга тўғри ёндашув бўлса, ёшлар билан ишланса, халқаро мусобақаларга катта муваффақиятларга эриша олишимизга шубҳа қилмайман. Яқин йилларда жаҳон чемпионати финал босқичига илк бора чиқа оладиган аъло даражадаги жамоани ташкил қила оламиз, деб умид қиламан.
