Бу йил биринчи лигада муваффақиятли иштирок этиб кучлилар сафига қайтган “Андижон” жамоаси футболчилари қишки таътилга чиқишди. Хабарингиз бор, 13 ноябрь куни “Соғлом авлод” стадионида “Андижон” ва “Бунёдкор” жамоалари ўртасида хайрия учрашуви бўлиб ўтди. Қолаверса, шу куни жамоа мавсум якунига доир байрам кечасини ўтказди. Ана шу банкетдан сўнг футболчилар 15 декабрга қадар қишки таътилга чиқдилар.

Келаси мавсумда “Андижон” олий лигада иштирок этиши боис жамоа шунга яраша тайёргарлик кўради. 15 декабрдан бошланадиган дастлабки йиғин Андижонда олиб борилади. Ушбу йиғинда асосан футболчиларнинг тикланиш жараёни ўтказилади.

Жорий мавсумда ижарага олинган Сергей Смородин, Андрей Сидоров, Акмал Турсунбоев (барчаси - “Пахтакор”), Акром Комилов (“Бунёдкор”) ва Сардор Соибов (“Нефтчи”) каби футболчилар ўз клублари ихтиёрига қайтишди. Ҳозирча жамоани ҳеч ким тарк этгани йўқ.

Албатта, янги мавсумга тайёргарлик бошланганда мураббийлар таркибни кучайтиришни мақсад қилишган. Шу боис мавсумлар оралиғида “Андижон” жамоасида ҳам ўзгаришлар бўлади.