Бухорода бўлиб ўтган иккинчи лига жамоалари ўртасидаги биринчи лигага ўтиш турнирида қатнашган “Машъал-Академия” иккинчи ўринни эгаллаб, келаси йил биринчи лигада ўйнаш ҳуқуқини қўлга киритди.

Бахтиёр Сатторов бошчилигидаги жамоа дастлаб Сидарё вилоятининг “Толачи” жамоаси билан баҳс олиб бориб, 5:1 ҳисобида ғалаба қозонди. Кейин “Ғиждувон”дан 1:3 ҳисобида мағлубиятга учраган муборакликлар навбатдаги икки ўйинни ғалаба билан якунлашди.

Самарқанднинг “Баҳор-Геолог” клуби 3:1 ҳисобида доғда қолдирилган бўлса, охирги ўйинда Нукуснинг НГПИ жамоаси 1:0 ҳисобида мағлуб этилди. Нукусликлар билан кечган ҳал қилувчи баҳсда “Машъал-Академия”дан ягона тўпни ўйновчи-мураббий Икрем Репатов киритди. Унга тўпни ажойиб тарзда Жонибек Эгамбердиев етказиб берганини айтиб ўтишимиз жоиз. Шундай қилиб, 9 очко жамғарган футболчиларимиз келаси йил биринчи лигада қатнашадиган бўлишди. Биринчи ўринни 12 очко жамғарган “Ғиждувон” эгаллади.

1-тур. «Толачи» – «Машъал-А» - 1:5
2-тур. «Машъал-А» - «Ғиждувон» - 1:3
3-тур. «Баҳор-Геолог» - «Машъал-А» - 1:3
4-тур. «Машъал-А» - НГПИ – 1:0