ФИФА бош котиби Жером Вальке кеча Коста-ду-Сауипеда (Баия) бўлиб ўтган ЖЧ-2014 ташкилий қўмитаси матбуот анжуманида Бразилиядаги мундиалнинг мукофот пуллари 2010 йилги чемпионатдан кўра учдан бир қисмга ошганини эълон қилди.

ЖАРда ўтган мусобақаларнинг умумий соврин жамғармаси $ 420 миллионни ташкил этган. Навбатдаги чемпионатники эса $ 560 миллион бўлади. ЖЧ-2014 ғолиби 2010 йил Испания олгандан кўра $ 10 миллион кўп мукофот олади.

Вальке бу борадаги нутқини қисқа қилиб, батафсил маълумотлар чоршанба куни эълон қилинишини айтди.

“Бу жаҳон чемпионатида ўсиш сезиларли бўлади, камида 33 фоиз. Бу аввалги мусобақага қараганда жуда катта кўрсаткичдир. Чоршанба куни ФИФА молия қўмитаси ўз ҳисоботларини эълон қилади ва шунда барча тафсилотларга эга бўламиз. Бу сафар ўз ўйинчисини терма жамоага берган клубларга бериладиган пуллар $ 70 миллионни ташкил этади. Бу ҳам ўтган галгидан анча кўп”, - дейди Вальке.

Солиштириш учун аввалги жаҳон чемпионатлари мукофот жамғармаларининг тақсимотини тақдим этмоқдамиз.