ЎФФ президенти Мираброр Усмонов "Бунёдкор"га олтин медалларни топшириш тантанали маросимида жамоа ҳужумчиси, Олий лига - 2013 тўпурари Олександр Пишур Ўзбекистон терма жамоасини кучайтириши мумкинлиги ҳақида гапириб ўтганди. Вазиятга аниқлик киритиши мақсадида Sport.ua мухбири "Бунёдкор"нинг украиналик легионери билан боғланди.

"Қанақа Ўзбекистон терма жамоаси?! Мен ахир украинман! Ҳозир оилам билан дам оляпман. Фаолиятимга келсак, "Бунёдкор" раҳбарлари билан оғзаки келишувим бор", - дейди Пишур.

Эслатиб ўтамиз, якунланган мавсум ушбу ҳужумчи учун фаолиятидаги энг муваффақиятлиси бўлди. 32 ёшли футболчи 19та гол билан Олий лига тўпурари бўлди, сентябр ойида Ўзбекистоннинг энг яхши ўйинчиси дея эътироф этилди. Бундан ташқари, унинг дубли Ўзбекистон кубоги финалида "Бунёдкор"га "Насаф" устидан ғалаба (2:1) олиб келди. Пишур ОЧЛдаги голлари ҳисобини ҳам очди. Умуман олганда эса, 2013 йилнинг барча ўйинларида 38 бор майдонга тушган футболчи 27та гол муаллифи бўлди.