Бундан 15 йил муқаддам Таиланд пойтахти Бангкокда XIII Осиё ўйинлари бўлиб ўтган эди.

Мусобақада амалдаги чемпион сифатида иштирок этган миллий терма жамоамиз турнирни Кувайтга қарши учрашуви билан бошлаган – 3:3. Гуруҳдаги иккинчи беллашувда эса Мўғулистон терма жамоаси 15:0 ҳисобида тиз чўктирилган. Ўша ўйинга бугун роппа-роса 15 йил бўлди.

Миллий терма жамоамизнинг энг йирик ғалабаси сифатида тарихдан жой олган учрашув айнан 5 декабрь куни ўтказилган эди. Ўша куни Сергей Лебедов покерга эришган. Уч футболчимиз – Игорь Шквирин, Неъматулло Қуттибоев, Миржалол Қосимов хет-трик қайд этишган. Андрей Акопянц ва Шуҳрат Раҳмонқулов эса биттадан голга муаллифлик қилишганди.

Мана орадан 15 йил ўтибдики, 15:0 натижаси ҳанузгача янгилангани йўқ. Бу натижа ҳали анчагача янгиланмаса ҳам керак.

Аммо Убиража Вега да Сильва бошчилигидаги ҳамюртларимиз 4 йил олдинги муваффақиятни такрорлай олишмаган. Ўша мусобақада терма жамоамизни чорак финалда Эрон тўхтатганди – 0:4.