Лондонда классик шахмат бўйича "London Chess Classic" шахмат фестивали дастуридан ўрин олган халқаро турнирда бугун тўртинчи тур баҳслари ўтказилади.    Дунёнинг 40 давлатидан келган 191 нафар шахмат усталари иштирокида ўтказилаётган мазкур нуфузли мусобақада Ватанимиз шарафини ҳимоя қилаётган халқаро мастер Жаҳонгир Воҳидов (2452) бугун британиялик Симон Анселга қарши дона суради.    Эътиборлиси, бугунга қадар ўтказилган уч тур ўйинларининг якунларига кўра Жаҳонгир 2,5 очко жамғариб, мағлубиятсиз одимлашда давом этмоқда. Тажрибали шахматчимиз биринчи турда мезбонлар вакили Стефан Приорни оқ доналарда ўйнаб енган бўлса, 2-турда қора доналарда Янги Зеландиялик спортчи билан дуранг натижани қайд этди. Учинчи турда оқ доналарда норвегиялик Питтер Стигарга қарши баҳс юритган ҳамюртимиз, навбатдаги ғалабани қўлга киритди.    Учинчи тур баҳсларининг якунларига кўра 10 нафар шахматчи учтадан очко жамғарган бўлса, бир йўла 22 нафар шахматчи ҳисобида 2,5 тадан очко мавжуд.    Эслатиб ўтамиз, 15-декабрга қадар давом этадиган мазкур халқаро турнир швейцарча тизимда 9 турдан иборат бўлади.