Sports.uz сайти эътиборингизга Европа чемпионлар лигаси тарихида юз берган қизиқарли жараёнлар, натижалар ва статистикани ҳавола қилади.

Бу мавсумда фақатгина Франциянинг “Марсель” клуби гуруҳ босқичини “қуруқ” тугатди. Таъкидлаш жоизки, “Марсель” Европа чемпионлар лигаси тарихида шундай салбий натижа қайд этган ўн олтинчи клуб бўлди.

Унгача қуйидаги клублар гуруҳда бирорта ҳам очко тўплолмай ўз юришларини тўхтатган:

1997/1998. «Кошице» (Словакия), тўплар нисбати — 2:13
2001/2002. «Фенербахче» (Туркия), 3:12
2002/2003. «Спартак» (Россия), 1:18
2002/2003. «Байер» (Германия), 5:15
2004/2005. «Андерлехт» (Бельгия), 4:17
2005/2006. «Рапид» (Австрия), 3:15
2006/2007. «Левски» (Болгария), 1:17
2007/2008. «Динамо» К (Украина), 4:19
2009/2010. «Маккаби» Х (Исроил), 0:8
2009/2010. «Дебрецен» (Венгрия), 5:19
2010/2011. «Жилина» (Словакия), 3:19
2010/2011. «Партизан» (Сербия), 2:13
2011/2012. «Оцелул» (Руминия), 3:11
2011/2012. «Вильярреал» (Испания), 2:14
2011/2012 «Динамо» З (Хорватия), 3:22
2013/2014. «Марсель» (Франция), 5:14

Жорий мавсумда Мадриднинг “Реал” клуби 6 учрашувда рақиблар дарвозасини 20 бор ишғол қилиб, “МЮ” ва “Барселона”нинг рекордини такрорлади. 

“Зенит” клубига гуруҳ босқичидан чиқиш учун рақиблар дарвозасини 5 бора ишғол қилиш кифоя қилган бўлса, бундан саккиз йил олдин “Рома” ва “Вильяреал”ни атиги 3 та гол 1/8 финалга олиб чиққан.

“Галатасарой”да ғалати бир статистика мавжуд. Клуб олти учрашувда 14 та тўп ўтказиб юборишига қарамай, кейинги босқич йўлланмасини нақд қилди. Худди шундай ҳолатни 2000/2001 йилда “Андерлехт” мисолида ҳам кўришимиз мумкин.

Ўтган мавсумда “Челси” клуби 16 бор рақиб дарвозасини ишғол қила туриб кейинги босқичга ўтолмаган эди. Бу мавсумда эса, “Наполи” 10 та гол ва 12 очко билан Европа Лигасига равона бўлди.

Бу сафар “Зенит” 1 та ғалаба ҳамда 3 даранг эвазига 1/8 финалга чиққан бўлса, 1998/1999 йилги мавсумда “Ювентус” қаторасига 5дуранг ва сўнгги 6-турдагина “Русенбург” устидан ғалаба қозониб гуруҳида 1-ўрин билан плей-офф масаласини ҳал қилган.

Шундай натижани Голландиянинг икки клуби – “Фейеноорд”(1999/2000) ва “Аякс”(2002/2003) ҳам қайд этган. Фақат улар ўз гуруҳларида иккинчи бўлганди.

Яқин келажакда Райан Гиггз, Хави ва Икер Касильяс Раульнинг энг кўп ўйин ўтказиш бўйича рекордини (142 та ўйин) янгилаши мумкин.

Гиггз — 139 Хави — 137 Касильяс — 133 Криштиану Роналду тўпурурлик борасида ҳамон Лионель Мессининг изидан келмоқда. Умумий ҳисобда ҳали-ҳамон Рауль пешқадам – 71 та гол.

Рауль — 71 гол
Лионель Месси — 65
Криштиану Роналду — 59

Нурали Йўлдошев тайёрлади