Ўзбекистоннинг амалдаги чемпиони ва кубоги соҳиби “Бунёдкор” жамоаси янги мавсумга тайёргарликни бошлади. 14 декабрь куни жамоа аъзолари тўпланишди ва футболчилар тиббий кўрикдан ўтишди. 15-16 декабрь куни асосан тикланиш машқлари режалаштирилган бўлса, 17 декабрдан бошлаб машғулотлар кунига 2 мартадан ўтказилади. Дастлабки йиғин 29 декабрь куни ниҳоясига етади.

2014 йилнинг 3 январь куни “қалдирғочлар” иккинчи йиғин учун тўпланишади ва 2 ҳафта давомида яна ўз қароргоҳларида жисмоний машғулотларга зўр беришади. 18 январь куни эса “Бунёдкор” жамоаси дастлабки хорижий йиғинни ўтказиш учун БААга жўнаб кетади.

Жамоадаги ўзгаришларга тўхталсак, клуб билан шартномалари ниҳоясига етган футболчилар - дарвозабон Игнатий Нестеров, ҳимоячи Анвар Ғофуров, ярим ҳимоячилар Лутфулла Тўраев ва Жасур Хасанов жамоани тарк этишди ва пойтахтнинг яна бир клуби – “Локомотив” сафига ўтишди. Ўз навбатида “Бунёдкор” клуби ҳимоячилар Бобуржон Акбаров (“Гулистон”) ва Шукурали Пўлатов (“Нефтчи”), шунингдек ҳужумчи Воҳид Шодиевни (“Бухоро”) ўз сафига таклиф этди. Кеча бу футболчилар билан 2 йиллик муддатга шартнома имзоланди.

Селекция ишлари мавсум бошлангунча давом этади. Легионерлар масаласига эса, БАА ва Туркиядаги йиғинлардан сўнг ойдинлик киритилади.