Мезбонлик ҳуқуқига кўра Франция терма жамоаси "Евро-2016"нинг дастлабки иштирокчиси бўлади. Турнир 10 июндан 10 июлгача бўлиб ўтади ва унда аввалгидек 16 та эмас, балки 24 та терма жамоа 6 гуруҳга бўлинган ҳолда ўзаро рақобатлашади.
Европа чемпионатининг саралаш турнирида қатнашиш учун қитъанинг 53 та мамлакати футбол федерацияларидан ариза қабул қилинган. Саралаш мусобақасининг қуръа маросими келаси йилнинг 23 февралида Ницца шаҳрида бўлади.
Яна бир янгилик шундан иборатки, саралаш турниридаги гуруҳ баҳсларида ҳар бир тур уч кун давомида ўтказилади.
"Биз мухлисларга футбол завқини улашиш учун "Футбол ҳафтаси" концепциясини ишлаб чиқдик, - дейди УЕФА бош котиби Жанни Инфантино. - Унга мувофиқ, олдингидек тўрт кун ичида иккита тур ўтказилмайди. Унинг ўрнига уч кун мобайнида турли гуруҳларда учрашувлар бўлиб ўтади. Томошабинлар шунда кўпроқ ўйинларни жонли эфир орқали томоша қилишлари мумкин".
Саралаш учрашувлари қуйидаги саналарда бўлиб ўтади:
1-тур: 7/8/9 сентябрь 2014
2-тур: 9/10/11 октябрь 2014
3-тур: 12/13/14 октябрь 2014
4-тур: 14/15/16 ноябрь 2014
5-тур: 27/28/29 март 2015
6-тур: 12/13/14 июнь 2015
7-тур: 3/4/5 сентябрь 2015
8-тур: 6/7/8 сентябрь 2015
9-тур: 8/9/10 октябрь 2015
10-тур: 11/12/13 октябрь 2015
9 та гуруҳда дастлабки икки ўринни эгаллаган ва учинчи ўринни олган жамоалар ўртасида энг яхши кўрсаткичга эга бўлган битта терма жамоа тўғридан-тўғри финал босқичи йўлланмасини қўлга киритади. Учинчи ўринни эгаллаган қолган саккизта жамоалар эса, ўзаро жуфтликларга бўлиниб, уй-сафар тизимидаги ўтиш баҳсларида куч синашади.
Ўтиш ўйинлари қуйидаги саналарда бўлади:
Дастлабки ўйинлар: 12/13/14 ноябрь 2015
Жавоб ўйинлар: 15/16/17 ноябрь 2015
"Евро-2016"нинг финал ўйинларига қуръа ташлаш маросими 2015 йил 2 декабрь куни Париж шаҳрида ўтказилади.
Нурали Йўлдошев тайёрлади.
