Бирлашган Араб Амирликларининг Ал-Айн шаҳрида 8 ёшдан 18 ёшгача бўлган болалар, ўсмирлар ва қизлар ўртасида ўтказилаётган жаҳон чемпионатида 13 нафар спортчиларимиз дастлабки турда ғалаба қозондилар.

Халқаро шахмат федерацияси (FIDE) шафелигида ташкил этилган мазкур нуфузли мусобақада дунёнинг 123 давлатидан энг иқтидорли ёш шахматчилар иштирок этишмоқда.

2012 йили Словениянинг Марибор шаҳрида 8 ёшгача бўлган шахматчилар ўртасида жаҳон чемпионлигини қўлга киритган Нодирбек Абдусатторов бу сафар ўн ёшгача бўлган спортчилар баҳсидаги иштирок этмоқда. Иқтидорли шахматчимиз биринчи турда финляндиялик Патрик Аалтони мағлубиятга учратиб, дастлабки очкони қўлга киритди. Нодирбек иккинчи турда сербиялик Лука Будисавлиевичга қарши дона суради.

8 ёшгача ўғил болалар ўртасида Жавоҳир Синдоров Гонконг вакили Мигел Вангни енгган бўлса, Исломбек Синдаров кениялик спортчидан устун келди.

12 ёшгача бўлган шахматчилар баҳсида ҳар уччала спортчимиз - Саидакбар Сайдалиев, Нодирбек Ёқуббоев ва Шамсиддин Воҳидов биринчи турда ғалаба қозондилар.

14 ёшгача бўлган спортчилар ўртасида Ортиқ Неъматов Бирлашган Араб Амирликлари вакили Саиф Идрис Ал Ҳамидни мағлуб этди.

Ўғил болалар ўртасида ўтказилаётган мусобақаларда, шунингдек, Суҳроб Авалбоев (10 ёш), Жамол Шовдиров (10 ёш), Элбек Жуманов (16 ёш) ва Шаварш Бадалян (18 ёш) дастлабки турда дуранг натижани қайд этишди.

Қизлар мусобақасида ҳамюртларимиздан Лобар Раҳматжонова (8 ёш) мўғулистонлик Алтантуя Болдбаатарни, Юлия Хегай (10 ёш) чехиялик Кристина Лауринцовани, Диёра Шарифова (12 ёш) ироқлик Сали Абдулзаҳрони, Баҳора Абдусатторова (14 ёш) латвиялик Дария Литвяковани, Дина Абдул Мажид (14 ёш) канадалик Рэйгел Таони, Нилуфар Ёқуббоева (14 ёш) мисрлик Мария Хажиниколауни мағлубиятга учратдилар.

Дастлабки турда, шунингдек, терма жамоамиз аъзоларидан Гулруҳбегим Тоҳиржонова (14 ёш), Асал Салимова (12 ёш), Гулҳаё Нарзиқулова (16 ёш) ва Шаҳноза Турсунова (16 ёш) дурангга имзо чекдилар.