Бугун Шўрбулоқ даҳасидаги сунъий қопламали майдонда “Андижон” жамоаси ўзининг дастлабки назорат учрашувини ўтказди. Андижонликлар Фарғона вилояти чемпиони “Динамо” жамоаси билан куч синашди.

Аввало шуни айтиб ўтиш керакки, “Динамо” жамоасига “Нефтчи”нинг собиқ футболчилари Баҳром Ҳайдаров ва Хушбек Қосимов бошчилик қилишмоқда. Қолаверса, бу жамоа яқинда Тошкентда ўтган биринчи лигага ўтиш турнирида ҳам иштирок этиб қайтди. Андижонликлар устози Азамат Абдураимов бу ўйинда ихтиёридаги барча футболчиларни синовдан ўтказди. Фақат жароҳат олгани сабабли Бекзод Ғозиев майдонга туша олмади.

“Андижон” таркиби: С.Смородин, Ғ.Комилов, Д.Турсунов, А.Раҳмонов, В.Магерамов, И.Отахонов, Р.Раҳмонов, А.Тўхтасинов, С.Соибов, Б.Абдураҳимов, Л.Солиев.
Захирадан майдонга тушганлар: А.Ортиқов, Н.Павленко, С.Нўъмонов, Ш.Рўзиев, Б.Содиқов, Д.Жамолддинов, А.Жўрабоев.
Гол: Л.Солиев (пен).

Биринчи учрашув бўлгани учун футболчиларда барибир ўйин амалиёти камлиги билинди. Қолаверса, “Динамо”нинг ёш футболчилари ҳам мезбонларга муносиб қаршилик кўрсатишга ҳаракат қилишди. Тажрибали ҳужумчи Лочин Солиевнинг пенальтидан киритган ягона голи ўйин тақдирини ҳал қилди.