Янги йил байрами арафасида Фарғона вилоятининг Риштон туманида янги спорт мажмуаси фойдаланишга топширилди.
Мажмуанинг очилишига бағишланган тадбирда Президентимиз раҳнамолигида ёш авлодни ҳар томонлама баркамол инсонлар этиб тарбиялаш, ёшларнинг жисмоний тарбия ва спорт билан мунтазам шуғулланиши учун зарур шароит яратиш борасида кенг қамровли ишлар амалга оширилаётгани таъкидланди.
Ўзбекистон Республикаси Халқ таълими вазирлиги ҳузуридаги Болалар спортини ривожлантириш жамғармаси Фарғона вилояти филиали маблағлари ҳисобидан барпо этилган мазкур мажмуада 500 нафардан зиёд ўғил-қиз спортнинг мини-футбол, волейбол, баскетбол, кураш, оғир атлетика ва гимнастика турлари билан мунтазам шуғулланиш имконига эга.
– Ушбу мажмуа биз ёшларнинг спорт билан мунтазам шуғулланишимиз ва саломатлигимизни мустаҳкамлашда муҳим аҳамият касб этади, – дейди белбоғли кураш бўйича Ўзбекистон чемпиони Зайнобиддин Ортиқов. – Бу мамлакатимизда соғлом турмуш тарзини қарор топтириш борасида амалга оширилаётган кенг кўламли ишларнинг амалдаги ифодасидир.
